چیئرمین سینیٹ دی قیادت اچ آئی ایس سی دے وفد دی کمبوڈیا دے سینیٹ دے صدر نال ملاقات، عالمی امن کیتے مؤثر پارلیمانی سفارت کاری تے زور

اسلام آباد / نوم پنہہ۔27اگست (اے پی پی) چیئرمین سینیٹ سید یوسف رضا گیلانی ݙوجھی بین الپارلیمانی سپیکرز کانفرنس (آئی ایس سی) اچ شریک تمام سپیکرز تے وفود دے نال کمبوڈیا دے سینیٹ دے صدر سامدیک موہا بورور تھپادی ہن سین نال خیرسگالی ملاقات کیتی۔ سینیٹ سیکرٹریٹ دے مطابق ملاقات دے دوران چیئرمین سینیٹ سید یوسف رضا گیلانی کانفرنس دی میزبانی تے کمبوڈیا دے سینیٹ دا شکریہ ادا کیتا اتے بین الپارلیمانی مکالمے دے فروغ کیتے سامدیک ہن سین دی قیادت تے کوششاں کوں سراہیا۔ آئی ایس سی دے شرکاء توں خطاب کریندیں ہوئیں چیئرمین سینیٹ عالمی امن دے فروغ تے ودھندے ہوئے عالمی چیلنجز نال نبڑݨ کیتے مؤثر پارلیمانی سفارت کاری، مشترکہ اقدامات تے بین الاقوامی قانون دی پاسداری کوں ناگزیر قرار ݙتا۔ انہاں آکھیا جو دنیا ایں ویلھے مسلح تنازعات، جغرافیائی سیاسی کشیدگی، معاشی غیر یقینی، دہشت گردی تے موسمیاتی تبدیلی دے ودھدے ہوئے اثرات سمیت کئی بحراناں دا سامݨا کریندی پئی اے، ایجھیں اچ آپسی مکالمہ تے عالمی تعاون پہلے توں کتھائیں ودھ اہم تھی ڳئے۔ چیئرمین سینیٹ آکھیا جو آئی ایس سی کوں ایجھا مؤثر پلیٹ فارم بݨݨا چاہیدے جتھاں پارلیماناں آپسی مکالمے، اتفاقِ رائے تے تعاون دے ذریعے تنازعات دے پرامن حل اچ آپݨا کردار ادا کر سڳن۔ انہاں شریک پارلیماناں تے زور ݙتا جو او ایں فورم دے مستقبل دی تشکیل اچ فعال کردار ادا کرن، کیونجو انسانیت کوں درپیش چیلنجز سرحداں دے پابند نئی اتے اِنھاں دے حل کیتے اجتماعی کوششاں ضروری ہن۔