شفا انٹرنیشنل ہسپتال دی “شفا ایمبولینس سروس” جے سی آئی ایکریڈیٹیشن حاصل کر ڳھدی

اسلام آباد۔28اگست(اے پی پی)شفا انٹرنیشنل ہسپتال پاکستان اتے خطے دے شعبہِ صحت اچ ہک اہم ٻلھانڳ ٻھریندے ہوئے طبی خدمات اچ اعلیٰ معیار، مریضاں دے تحفظ اتے بین الاقوامی طور تے مسلمہ نگہداشت دے معیار سانڳے وݙی کامیابی حاصل کیتی اے اتے شفا انٹرنیشنل ہسپتال دی “شفا ایمبولینس سروس” جے سی آئی ایکریڈیٹیشن حاصل کر ڳھدی اے۔ شفا انٹرنیشنل ہسپتال دے ترجمان موجب شفا دے کئی اداریاں اتے طبی پروگراماں کوں جوائنٹ کمیشن انٹرنیشنل (جے سی آئی) ولوں منظوری اتے سرٹیفکیشن ملݨ نال شفا محفوظ، قابلِ اعتماد اتے ثبوتاں تے مبنی طبی نگہداشت سانڳے ہک نواں معیار ݙیندا پئے۔ ترجمان موجب ایں کامیابی دی اہمیت شفا ایمبولینس سروس (ایس اے ایس) دی جے سی آئی میڈیکل ٹرانسپورٹ ایکریڈیٹیشن نال ٻئی ودھ ڳئی اے، شفا ایمبولینس سروس پاکستان دی پہلی ایمبولینس سروس ٻݨ ڳئی اے جیکوں جے سی آئی دی ایکریڈیٹیشن ملی اے جیڑھی ملک اچ ہنگامی طبی خدمات اتے ہسپتال توں پہلے ݙتی ونڄݨ والی طبی نگہداشت دے شعبے اچ ہک ٻہوں وݙی کامیابی اتے پاکستان دی ہیلتھ کیئر کمیونٹی کیتے وݙے ماݨ دی ڳالھ اے۔ اے کامیابیاں جون 2026ء اچ شفا انٹرنیشنل ہسپتال کوں اکیڈمک میڈیکل سینٹر (اے ایم سی) دی ملی والی ایکریڈیٹیشن دے تسلسل اچ سامݨے آئیاں ہن۔ شفا دی ہوم ہیلتھ کیئر کمپنی ای-شفا کیتے وی جے سی آئی دے ہک تفصیلی اتے سخت جائزے توں بعد جے سی آئی ہوم کیئر ایکریڈیٹیشن کیتے سفارش کیتی ڳئی اے جیندے نال شفا ہسپتال دی حد توں ٻاہرو مریضاں دے گھراں تئیں معیاری طبی نگہداشت دے عزم کوں وسعت ݙتی اے۔ جون 2026ء اچ ایںدے ایکیوٹ اسکیمک سٹروک تے ایکیوٹ کورونری سنڈروم پروگرامز کوں وی جے سی آئی توں سرٹیفکیشنز ملین، اے کامیابی پاکستان اچ “کلچر آف کیئر” یعنی نگہداشت دے کلچر کوں ودھاوݨ اتے استحکام کیتے ہک فیصلہ کن ویلھا اے جو پاکستان اچ عالمی معیار دیاں طبی سہولتاں برقرار رکھیاں ونڄ سڳدن اتے انہاں کوں بیا بہتر وی ٻݨایا ونڄ سڳدے۔ ترجمان ایں کامیابی تے شکر کریندے آپݨی ٹیم دے ہر رکن کوں مبارک ݙتی اے جنہاں دی لگن، پیشہ ورانہ صلاحیت، ثابت قدمی اتے بہترین کارکردگی دے عزم ایں تاریخی کامیابیاں کوں ممکن ٻݨائے۔