موسمیاتی تبدیلی پاکستان کیتے ٻہوں وݙا چیلنج، مؤثر اتے طویل المدتی حکمتِ عملی اپناوݨی ہوسی، مصدق ملک

اسلام آباد۔ 29 اگست(اے پی پی)وفاقی وزیرِ موسمیاتی تبدیلی و ماحولیاتی ہم آہنگی ڈاکٹر مصدق ملک آکھیے جو موسمیاتی تبدیلی پاکستان کیتے ہک ٻہوں وݙا چیلنج ٻݨ چکی اے، ملک کوں سیلاب تے ٻیاں قدرتی آفات دے خطرات نال نمٹݨ کیتے مؤثر، مربوط اتے طویل المدتی حکمتِ عملی اپناوݨی ہوسی۔ اسلام آباد اچ تقریب نال خطاب کریندے انہاں آکھیا جو پاکستان موسمیاتی تبدیلی دے منفی اثرات نال ودھ متاثر تھیندا پئے، ایں چیلنج نال نمٹݨ کیتے سارے متعلقہ اداریاں کوں رل تے کم کرݨا ہوسی ڄݙاں جو عالمی تعاون اتے وسائل دی وی لوڑھ اے، ایں سانڳے اجتماعی اقدامات کرݨے ہوسن، موسمیاتی تبدیلی نال نمٹݨ دی صلاحیت اتے وسائل رکھݨ والے ملکاں کوں ایں حوالے نال آپݨا کردار ادا کرݨا چاہیدے۔ انہاں اکھیا جو پاکستان موسمیاتی انصاف دے حصول کیتے عالمی سطح تے آپݨا مقدمہ بھرپور انداز اچ پیش کریندا پئے۔ ماحولیاتی تحفظ اتے موسمیاتی موافقت کیتے مربوط پالیسیاں تے زور ݙیندے انہاں آکھیا جو قدرتی آفات دے نقصانات گھٹ کرݨ کیتے مقامی آبادیاں دی استعداد کار ودھاوݨی ہوسی، آفات نال نمٹݨ کیتے پیشگی تیاری اتے مؤثر منصوبہ بندی دی لوڑھ اے۔ انہاں موسمیاتی تبدیلیاں کوں ہک مشترکہ عالمی چیلنج قرار ݙیندے آکھیا جو ایندے کیتے قومی سطح تے مربوط اقدامات دے نال نال بین الاقوامی تعاون، وسائل اتے مشترکہ کوششاں ودھاوݨیاں ہوسن۔