پمز واقعہ  دی تحقیقاتی رپورٹ پیش، وزیراعظم دا 8 ذمہ داران کو فوری معطل کرتے فوجداری کارروائی دا حکم

اسلام آباد۔ 29 اگست(اے پی پی)پاکستان انسٹیٹیوٹ آف میڈیکل سائنسز(پمز)اچ ٻھا لڳݨ اتے ایندے نال معصوم ٻالاں دی جاناں دے زیان دے افسوسناک واقعہ دی رپورٹ وزیر اعظم کوں پیش کر ݙتی ڳئی جیندے تے وزیرِ اعظم واقعے دے 8 ذمہ داراں کوں فوری معطل کر تے فوجداری کارروائی دا حکم ݙتے۔ وزیراعظم محمد شہباز شریف دی اڳواݨی اچ اہم اعلیٰ سطح اجلاس تھئے جیندے اچ پمز اچ ٻھا لڳݨ دے واقعے تے ٻݨائی ڳئی تحقیقاتی کمیٹی دی عبوری رپورٹ وزیرِ اعظم کوں پیش کیتی ڳئی۔ وزیرِ اعظم رپورٹ اچ نشاندہی کیتے ڳئے 8 ذمہ داراں فوری طور تے معطل کر تے اِنھاں دے خلاف محکمانہ اتے فوجداری قوانین دے تحت بغیر کہیں وناڄھ دے کارروائی کرݨ دی منظوری ݙتی۔ معطل کیتے ونڄݨ والیاں اچ اچ پمز دے ایگزیکٹو ڈائریکٹر پروفیسر ڈاکٹر عمران سکندر، جوائنٹ ایگزیکٹو ڈائریکٹرز ڈاکٹر مطاہر شاہ اتے ڈاکٹر اویس علی شاہ، نیونیٹل ڈیپارٹمنٹ دی سربراہ پروفیسر ڈاکٹر سعدیہ ریاض، سینئر رجسٹرار ڈاکٹر نغم، ڈاکٹر نوشیلہ امجد، اسسٹنٹ ڈائریکٹر سکیورٹی پمز محمد عثمان اتے سی ڈی اے ایمرجنسی سروس دے ڈی جی ڈاکٹر عبدالرحمان شامل ہن۔ وزیرِ اعظم ذمہ داراں دے خلاف فوجداری قوانین دے تحت کارروائی دی ہدایت کریندے آکھیا جو مجرمانہ غفلت کرݨ آلے لوک کہیں رعایت دے مستحق کائنی، واقعے دے ذمہ داراں کوں کیفرِ کردار تئیں پڄایا ویسی۔ اجلاس اچ وزیرِ اعظم سکیورٹی ݙیوݨ آلی کمپنی اتے ایںدے عہدیداران دے خلاف وی کارروائی دی منظوری ݙتی، عہدیاں توں ہٹائے ڳئے افسران دی ڄای تے نویں افراد فوری لاوݨ دی ہدایت وی کیتی ڳئی۔ وزیرِ اعظم آپݨی جان دی پروا کیتے بغیر ٻال دی جان بچاوݨ والی نرس کیتے ستارۂ خدمت ݙیوݨ دی منظوری ݙتی ڄݙاں جو وارڈ اچ موجود ہک نرس اتے تریمت گارڈ کوں او ایس ڈی ٻݨا تے ٻئی تحقیقات دی ہدایت کیتی۔ وزیرِ اعظم ڈاکٹر محمد سلمان، سی ای او نیشنل انسٹی ٹیوٹ آف ہیلتھ (این آئی ایچ) کوں پمز دا ایکٹنگ ایگزیکٹو ڈائریکٹر لاوݨ دی ہدایت وی کیتی۔ تحقیقاتی کمیٹی دی عبوری رپورٹ دے مطابق پمز اچ ٻھا لڳݨ یا ہنگامی صورتحال نال نمٹݨ کیتے تفصیلی ایس او پیز اتے مناسب تربیت موجود نہ ہائی، پمز دے 13 ایس او پیز اچ صرف ݙو ذیلی سیکشنز اچ ٻھاہ یا ہنگامی صورتحال دا ذکر پایا ڳیا۔ رپورٹ اچ ݙسایا ڳیا جو واقعے ویلھے سپروائزری سٹاف ڈیوٹی تے موجود نہ ہا ڄݙاں جو وارڈ اچ ݙو نرساں، ہک خاتون گارڈ اتے ہاؤس آفیسر موجود ہن، ٻھاہ لڳݨ توں بعد پورا وارڈ تقریباً ݙو منٹاں اچ سڑ ڳیا۔ ابتدائی تحقیقات دے مطابق ٻھاہ لڳݨ دے 6 منٹاں توں بعد ایمرجنسی سروسز کوں کال کیتی ڳئی ڄݙاں جو پہلا ایمرجنسی رسپانس 15 منٹاں توں بعد پڄیا، وارڈ اچ فائر الارم اتے سپرنکلر سسٹم وی موجود نہ ہا۔ رپورٹ اچ ݙسایا ڳیا جو جولائی اچ پمز نرسنگ ہاسٹل اچ بھا لڳݨ دے باوجود ہسپتال اچ حفاظتی اقدامات دے حوالے نال مؤثر اقدامات نئیں کیتے ڳئے، نیونیٹل وارڈ اچ فائر سیفٹی بارے عالمی ادارہِ صحت دے قواعد دی وی خلاف ورزی پاتی ڳئی۔ اجلاس اچ پمز دی خراب حالی اتے بدانتظامی بارے وزیرِ اعظم کوں بریفنگ ݙتی ڳئی۔ وزیرِ اعظم تحقیقاتی کمیٹی دے سربراہ شاہد خان اتے ارکان دا شکریہ ادا کریندے تحقیقات مکمل کر تے مزید تفصیلی رپورٹ پیش کرݨ دی ہدایت کیتی۔ وزیرِ اعظم آکھیا جو معصوم ٻالاں دی موت ہک اینڄھ افسوسناک واقعہ اے جیندے تے پوری قوم غمگین اے، ٻالاں دے والدین نال میں سودھا پوری قوم دیاں ہمدردیاں ہین اتے ذمہ داراں کوں مثالی سزا ݙوائی ویسی تاں جو اڳو تے کہیں دی مجرمانہ غفلت نال کہیں ما دا لختِ جگر جدا نہ تھیوے۔ وزیرِ اعظم تحقیقاتی کمیٹی دی عبوری رپورٹ فوری طور تے عوام دے اڳو ڳھن آوݨ دی ہدایت وی کیتی، رپورٹ وزارتِ قومی صحت دی ویب سائٹ تے جاری کیتی ویسی۔ اجلاس اچ وفاقی وزراء احد خان چیمہ، عطا اللہ تارڑ، سید مصطفیٰ کمال، تحقیقاتی کمیٹی دے سربراہ شاہد خان، ارکان بیرسٹر نبیل اعوان، میجر جنرل (ر) خورشید اترا اتے ٻئے متعلقہ اعلیٰ حکام شرکت کیتی۔