ایس سی او مشترکہ چیلنجاں نال نبڑݨ دے اجتماعی عزم دی علامت اے، مکہ مشترکہ دفاعی معاہدہ علاقائی امن دے حوالے نال اساݙے مشترکہ عزم دا اظہار اے، وزیرِ اعظم شہباز شریف دا ایس سی او سربراہانِ مملکت دی کونسل دے اجلاس توں خطاب

بشکیک۔1ستمبر (اے پی پی) وزیرِ اعظم محمد شہباز شریف شنگھائی تعاون تنظیم کوں عالمی امن تے استحکام کیتے اہم پلیٹ فارم قرار ݙیندیں ہوئیں آکھیا جو ایس سی او مشترکہ چیلنجاں نال نبڑݨ دے اجتماعی عزم دی علامت اے، پاکستان ایس سی او دا فعال تے ذمہ دار رکن اے، اساں تنازعات دے پرامن حل کیتے بین الاقوامی قانون دے مطابق اقوامِ متحدہ تے ایس سی او چارٹر دی رہنما ہدایات تے سختی نال عمل پیرا رہوݨ کیتے پرعزم ہن، پاکستان علاقائی بحران دے دوران امن کیتے موثر کردار ادا کیتے، مکہ مشترکہ دفاعی معاہدہ خودمختاری، علاقائی سالمیت، اجتماعی سلامتی تے علاقائی امن دے حوالے نال اساݙے سانجھے عزم دا اظہار اے، پاکستان پرامن، مستحکم تے خوشحال افغانستان دا خواہاں اے ڄݙاں جو دہشت گرد افغان سرزمین کوں پاکستان تے ٻئے ہمسایہ ملکاں تے حملیاں، بے گناہ لوکاں دے قتل کیتے استعمال کریندے رہسن، خطے اچ کݙاہیں امن نئی تھی سڳدا، بین الاقوامی برادری کوں فلسطینی عوام سمیت تمام مظلوم اقوام کوں انھاں دے حقِ خودارادیت دے بنیادی حق دے حصول اچ مدد ݙیوݨ دے آپݨے عزم کوں پورا کرݨا چاہیدے، پاݨی اساݙی آوݨ آلیاں نسلاں دے مستقبل کوں محفوظ بݨیندے، اینکوں کݙاہیں ہتھیار دے طور تے استعمال نئی کرݨا چاہیدا، پاکستان سماجی تحفظ کوں ٻیا مضبوط بݨاوݨ تے ایس سی او خطے اچ جامع تے پائیدار ترقی دے فروغ کیتے آپݨی کوششاں جاری رکھیسی۔

اے ڳالھیں انہاں منگل کوں اتھاں شنگھائی تعاون تنظیم دے سربراہانِ مملکت دی کونسل دے اجلاس توں خطاب کریندیں ہوئیں کیتا۔ وزیرِ اعظم اکھیا جو بشکیک دے خوبصورت شہر اچ شنگھائی تعاون تنظیم دے رہنماواں دے تاریخی اجلاس اچ شرکت انھاں کیتے باعثِ اعزاز اے اتے پرخلوص میزبانی تے کانفرنس کیتے شاندار انتظامات تے صدر صادر ژاپاروف تے انھاں دی ٹیم دا شکریہ ادا کریندن، جمہوریہ کرغزستان کوں ایس سی او چیئرمین شپ دی مدت دی کامیابی نال تکمیل تے ایس سی او ملکاں وچال عملی تعاون کیتے موثر کردار تے مبارکباد پیش کریندن۔ وزیرِ اعظم کرغزستان تے ازبکستان دی قیادت تے عوام کوں انھاں دے یومِ آزادی دی وی دلی مبارکباد ݙتی۔ انہاں آکھیا جو شنگھائی تعاون تنظیم عالمی امن و استحکام کیتے اہم پلیٹ فارم اے، شنگھائی سپرٹ دے تحت پاکستان کوں شنگھائی تعاون تنظیم دا رکن ہووݨ تے فخر اے، پاکستان ایس سی او دا فعال تے ذمہ دار رکن اے، ایس سی او دے 25 سال مکمل تھیوݨ اہم سنگِ میل اے، ہک نکے پودے توں شروع تھیوݨ آلی ایس سی او اڄ ہک تناور درخت دی شکل اختیار کر ڳئی اے، جو اساں سبھ کوں سلامتی تے استحکام دا سایہ فراہم کریندی پئی اے۔ انہاں آکھیا جو اڄ دا عالمی منظرنامہ ودھدی ہوئی جغرافیائی تے سیاسی کشیدگی، عالمی معیشت دے انتشار، موسمیاتی بحراناں اچ اضافے تے ٹیکنالوجی دی بے مثال تبدیلیاں نال دوچار اے، ایہوسویں پیچیدہ ماحول اچ ایس سی او انھاں وݙے چیلنجاں نال رل تے نٻڑݨ تے آپݨے عوام کیتے امن، سلامتی تے خوشحالی کوں یقینی بݨاوݨ دے اساݙے اجتماعی عزم دی نمائندگی کریندی اے۔

انہاں آکھیا جو پاکستان اقوامِ متحدہ تے ایس سی او دے چارٹرز دے بنیادی اصولاں کوں ہمیشہ برقرار رکھیندے اتے انھاں دا احترام کریندے، اساں تنازعات دے پرامن حل کیتے بین الاقوامی قانون دے مطابق، اقوامِ متحدہ تے ایس سی او چارٹر دی رہنما ہدایات تے سختی نال عمل پیرا رہوݨ کیتے پرعزم ہن، جیندے اڄ بشکیک اعلامیے اچ وی توثیق کیتی ڳئی اے، ایں جذبے دے تحت پاکستان ایں سال دے اوائل اچ ایں وقت امن دی بھرپور حمایت کیتی ڄݙاں ہک ایس سی او رکن ریاست دی خودمختاری اتے علاقائی سالمیت دی خلاف ورزی کیتی ڳئی، جیندے نتیجے اچ ہک وݙا علاقائی بحران پیدا تھیا، ایں بحران پاروں توانائی دی فراہمی دے اہم راستیاں دی بندش عالمی معیشت کوں متاثر کیتے۔ نتیجتاً پاکستان وی عالمی برادری دے نال رَل تے بھاری اقتصادی قیمت ادا کیتی اے اِنھاں مشکل حالات اچ پاکستان مسلسل ہک ایماندار تے مخلص ثالث تے سہولت کار دا کردار ادا کیتے۔

وزیرِ اعظم آکھیا جو اساݙی مسلسل سفارتی کوششاں تاریخی اسلام آباد مفاہمتی یادداشت (ایم او یو) تے دستخط دی صورت اچ نتیجہ خیز ثابت تھیاں، جو علاقائی کشیدگی اچ کمی تے امن دی بحالی دی پاسے ہک اہم قدم اے، جیویں جیویں اساݙیاں امن دے قیام دی کوششاں جاری ہن اساں اِنھاں برادر تے دوست ملکاں دے تہہ دل توں شکرگزار ہیسے جنھاں اچوں ٻہوں سارے ملکاں دے نمائندے اڄ اتھاں موجود ہن جنھاں ایں کوشش دے دوران آپݨی غیر متزلزل حمایت فراہم کیتی اساݙا پختہ یقین اے جو اسلام آباد مفاہمتی یادداشت اساݙے خطے اچ پائیدار امن دے قیام کیتے سبھ توں قابلِ عمل تے دیرپا راستہ فراہم کریندی اے۔ وزیرِ اعظم اکھیا جو پاکستان حال اچ سہہ فریقی مکہ مشترکہ دفاعی معاہدے تے دستخط کیتن اے تاریخی معاہدہ خودمختاری، علاقائی سالمیت، اجتماعی سلامتی تے علاقائی امن دے حوالے نال اساݙے مشترکہ عزم دا اظہار اے اے بنیادی طور تے دفاعی نوعیت دا معاہدہ اے اتے نہ تاں کہیں ریاست دے خلاف اے اتے نہ ای ایندا مقصد کہیں قسم دی محاذ آرائی یا تقسیم پیدا کرݨ اے۔ وزیرِ اعظم اکھیا جو پاکستان ہمیشہ کثیرالجہتی نظام کوں مضبوط بݨاوݨ کیتے کوششاں کیتین جڈانجو کثیرالجہتی تنظیماں کوں ایں قابل بݨاوݨ ضروری اے جو او امنگاں تے خواہشاں کوں عملی اقدامات اچ تبدیل کر سڳن، غزہ تے مغربی کنارے دے بے گناہ لوکاں دی حالتِ زار بدستور جاری اے، جو ناقابلِ تصور انسانی تکالیف دا باعث بݨدی پئی اے، فلسطینی ماواں آپݨے ٻالاں دے ݙکھ اچ گہرے صدمے اچ ہن، خاندان بکھردے پئن، تے پوریاں نسلاں خوف، محرومی تے ناانصافی دے مستقل چھاں تلے زندگی گزارݨ تے مجبور ہن۔ بین الاقوامی برادری کوں فلسطینی عوام سمیت تمام مظلوم اقوام کوں انھاں دے حقِ خودارادیت دے بنیادی حق دے حصول اچ مدد ݙیوݨ دے آپݨے عزم کوں پورا کرݨا چاہیدے، دنیا کوں انسانی ݙکھ تے تکالیف دے خاتمے کیتے، ایں ڳالھ توں قطع نظر جو او دنیا دے کہیں وی خطے اچ ہوون، متحد تھیوݨا چاہیدے، جنوبی ایشیا جو ایس سی او خطے دا ہک اہم حصہ اے پائیدار امن دے بغیر آپݨی مکمل صلاحیتاں کوں استعمال نئی کر سڳدا۔

وزیرِ اعظم اکھیا جو پاݨی اساݙے خطے دی زندگی دی بنیاد اے اے لکھاں لوکاں دی زندگیاں کوں سہارا ݙیندے، اساݙیاں زمیناں کوں سیراب کریندے اتے اساݙی آوݨ آلی نسلاں دے مستقبل کوں محفوظ بݨیندے، اینکوں کݙاہیں وی ہتھیار دے طور تے استعمال نئی کرݨا چاہیدا، اینکوں نہ تاں دباؤ پاوݨ دے ہک ذریعے دے طور تے استعمال کیتا ونڄ سڳدے اتے نہ اینکوں کݙاہیں سیاسی مفادات دے حصول کیتے استعمال کیتا ونڄ سڳدے، اساݙے مشترکہ آبی وسائل نال متعلق معاہدے سنجیدہ، پابند تے بین الاقوامی وعدے ہن، اے سیاسی مصلحتاں دے معاملے نئی جو جنھاں کوں آپݨی مرضی نال کہیں ویلھے وی نظرانداز کر ݙتا ونڄے،  وزیرِ اعظم اکھیا جو دہشت گردی آپݨی مختلف شکلاں تے مظاہر دے نال اساݙے پورے خطے کوں متاثر کرݨ آلے سنگین ترین خطراں اچوں ہک اے، گزشتہ سال توں شنگھائی تعاون تنظیم دے علاقائی انسدادِ دہشت گردی ڈھانچے دی صدارت دے طور تے پاکستان علاقائی انسدادِ دہشت گردی تعاون کوں مضبوط بݨاوݨ کیتے بھرپور تے فعال کردار ادا کیتے، تھوڑے ای ملکاں دہشت گردی دی لعنت دے خلاف پاکستان سویں پرعزم تے بہادری دے نال جنگ لڑی اے، گزشتہ اݙھائی ݙہاکیاں دے دوران اساں دہشت گردی دے خلاف جنگ اچ 90 ہزار توں ودھ جاناں دی قربانیاں ݙتیاں ہن اتے 150 ارب امریکی ڈالر توں ودھ دے معاشی نقصانات برداشت کیتے ہن، اے قربانیاں صرف پاکستان کیتے نئی بلکہ انھاں دا مقصد ہک محفوظ تے زیادہ پرامن خطے، تے ایں توں اڳوں دی دنیا کوں یقینی بݨاوݨ ہا۔ چین پاکستان اقتصادی راہداری (سی پیک) بدستور ہک اہم گیٹ وے دے طور تے خدمات انجام ݙیندی پئی اے جو علاقائی معیشتاں کوں بحیرہ عرب نال جوڑیندی اے، اساں موجودہ بین العلاقائی ریلوے منصوبیاں، سڑکاں دے رابطیاں نال متعلق اقدامات تے علاقائی توانائی منصوبیاں کوں اڳوں ودھاوݨ کیتے وی یکساں طور تے پرعزم ہیسے۔ وزیرِ اعظم اکھیا جو اساکوں آپݨی تمام توانائیاں “ایس سی او ترقیاتی حکمتِ عملی برائے 2035” تے عملدرآمد یقینی بݨاوݨ کیتے صرف کرݨی چاہیدن، ایس سی او ڈویلپمنٹ بینک دا قیام ایں حوالے نال ہک اہم تے فیصلہ کن قدم ہوسی، غربت دے خاتمے نال متعلق ایس سی او دے خصوصی ورکنگ گروپ دے مستقل چیئرمین دی حیثیت نال، پاکستان سماجی تحفظ کوں ٻیا مضبوط بݨاوݨ تے ایس سی او خطے اچ جامع تے پائیدار ترقی دے فروغ کیتے آپݨی کوششاں جاری رکھیسی۔

وزیرِ اعظم اکھیا جو پورے خطے اچ ڈیزاسٹر مینجمنٹ کیتے رابطہ کاری، پیشگی انتباہ تے امدادی اقدامات کوں ٻیا موثر بݨاوݨ کیتے پاکستان اسلام آباد اچ 2026-2027ء دے دوران “گلوبل ریزیلینس ایکسپو” دے انعقاد دی تجویز ݙتی اے، ایس سی او دی پاکستان دی صدارت دا مرکزی موضوع ہوسی، “وژن کوں عمل اچ بدلݨ: روابط، جدت طرازی تے مشترکہ خوشحالی”۔ وزیرِ اعظم آکھیا جو اساں ایں ذمہ داری کوں عاجزی، امید تے ایں پختہ یقین دے نال قبول کریندوں جو روابط اساݙے عوام کوں ہک ٻئے دے نیڑے ڳھن آسن۔ اساں عزم دے نال رل تے اڳوں ودھوں جو غیر یقینی دے ایں دور اچ تاریخ ایس سی او کوں ایں یاد رکھیسی جو ایں تصادم تے تعاون، تقسیم تے مکالمے، رکاوٹاں تے پلاں تے خوف تے امید کوں ترجیح ݙتی، تاریخ اے وی رقم کرسی جو ایس سی او محض ہک بدلدی ہوئی دنیا دا مشاہدہ نئی کیتا، بلکہ اساں ایں دنیا کوں تشکیل ݙیوݨ اچ وی آپݨا کردار ادا کیتا۔