سکیورٹی فورسز پاک افغان سرحد توں دراندازی دی کوشش کرݨ آلے بھارتی حمایت یافتہ فتنہ الخوارج دے 15 خوارج کوں جہنم واصل کر ݙتا، آئی ایس پی آر

راولپنڈی۔ 03 ستمبر (اے پی پی) سکیورٹی فورسز شمالی وزیرستان ضلع دے بالمقابل پاک افغان سرحد توں دراندازی دی کوشش کرݨ آلے بھارتی حمایت یافتہ فتنہ الخوارج دے 15 خوارج کوں جہنم واصل کر ݙتا۔ خمیس کوں پاک فوج دے شعبہ تعلقات عامہ (آئی ایس پی آر) توں جاری بیان دے مطابق 31 اگست تے یکم ستمبر دی وچلی رات سکیورٹی فورسز شمالی وزیرستان ضلع دے بالمقابل پاک افغان سرحد توں دراندازی دی کوشش کرݨ آلے بھارتی سرپرستی اچ سرگرم فتنہ الخوارج نال تعلق رکھݨ آلے خوارج دے ہک گروہ دی نقل و حرکت دا سراغ لاتا۔ سکیورٹی فورسز پیشہ ورانہ مہارت تے صبر و تحمل دا مظاہرہ کریندیں ہوئیں انہاں دا کامیابی نال مقابلہ کیتا۔ نتیجتاً 36 گھنٹے تئیں جاری رہݨ آلی انتہائی درست تے ماہرانہ کارروائی دے دوران بھارتی سرپرستی اچ سرگرم فتنہ الخوارج دے 15 خوارج کوں جہنم واصل کر ݙتا ڳیا۔ کلیئرنس تے سینیٹائزیشن آپریشن دے دوران ہلاک تھیوݨ آلے خوارج دے قبضے توں وݙی مقدار اچ اسلحہ تے گولہ بارود وی برآمد کیتا ڳیا ڄیندے نال ملک اچ امن تے استحکام کوں سبوتاژ کرݨ دے خواہاں خوارج تے انہاں دے سہولت کاراں دے مذموم عزائم ٻئے بے نقاب تھئن۔ پاک افغان سرحد تے پیش آوݨ آلا اے واقعہ ہک وار ٻیا پاکستان دے ایں مستقل موقف دی تائید کریندے جو افغان طالبان حکومت آپݨی زیرِ سرپرستی دہشت گرد تنظیم کوں سرحد پار دہشت گردی کیتے افغان سرزمین دے استعمال توں روکݨ اچ مکمل طور تے ناکام رہی اے۔ افغان طالبان حکومت موثر سرحدی انتظام کوں یقینی بݨاوݨ تے آپݨی بین الاقوامی ذمہ واریاں پوریاں کرݨ اچ مسلسل ناکام رہی اے۔ آئی ایس پی آر آکھیا جو پاکستان دی سکیورٹی فورسز ملکی سرحداں دے دفاع کیتے پُرعزم ہن۔ علاقے اچ موجود بھارتی سرپرستی اچ سرگرم ٻئے خوارج دے خاتمے کیتے سینیٹائزیشن آپریشن جاری اے۔ وفاقی ایپکس کمیٹی برائے نیشنل ایکشن پلان دی منظوری نال عزمِ استحکام دے وژن دے تحت سکیورٹی فورسز تے قانون نافذ کرݨ آلے اداریاں ولوں جاری انسدادِ دہشت گردی مہم پوری رفتار نال جاری رہسی تانجو ملک توں غیر ملکی سرپرستی تے حمایت یافتہ دہشت گردی دے ناسور دا مکمل خاتمہ کیتا ونڄ سڳے۔