پاکستان جموں تے کشمیر دی حیثیت بارے بھارت دے بے بنیاد دعویاں کوں مسترد کریندے، سجاد حیدر خان

اسلام آباد۔ 07 ستمبر (اے پی پی) ترجمان دفترِ خارجہ سفیر سجاد حیدر خان آکھیا جو پاکستان جموں تے کشمیر دی حیثیت بارے بھارت دے بے بنیاد دعویاں کوں واضح طور تے مسترد کریندے، ڄہرے بین الاقوامی طور تے تسلیم شدہ حقائق دے منافی ہن۔ بھارت دے یکطرفہ اقدامات تے مسلسل غیر قانونی قبضہ جموں تے کشمیر دی بین الاقوامی سطح تے تسلیم شدہ متنازعہ حیثیت کوں تبدیل نئی کر سڳدے۔ بھارت دی وزارتِ خارجہ توں متنازعہ جموں تے کشمیر دے نقشے بارے جاری کیتے ڳئے بیان بارے اچ میڈیا دے سوالاں دا جواب ݙیندے ہوئیں سنوار کوں ترجمان دفترِ خارجہ آکھیا جو جموں تے کشمیر دا تنازع اقوامِ متحدہ دی سلامتی کونسل دے ایجنڈے تے موجود قدیم ترین حل طلب تے بین الاقوامی سطح تے تسلیم شدہ تنازعیاں اچوں ہک اے۔ متعلقہ اقوامِ متحدہ دیاں قرار داداں اچ واضح کیتا ڳئے جو ایں تنازع دا حتمی فیصلہ سلامتی کونسل دیاں متعلقہ قرار داداں تے کشمیری عوام دیاں خواہشاں دے مطابق کیتا ونڄݨا چاہیدے، ڄیندا اظہار اقوامِ متحدہ دی نگرانی اچ آزادانہ تے غیر جانبدارانہ استصوابِ رائے نال تھیوے۔ ترجمان آکھیا جو اقوامِ متحدہ دے سرکاری نقشے، ڄنہاں اچ جموں تے کشمیر کوں ہک متنازعہ علاقہ ظاہر کیتا ڳئے، ایں دی موجودہ قانونی حیثیت دی واحد مستند نقشہ جاتی نمائندگی ہن۔ بھارت دے نام نہاد سرکاری نقشیاں تے خود ساختہ خودمختاری دے دعویاں دا متنازعہ علاقے دی حیثیت تے کوئی اثر نئی پوندا۔ ترجمان آکھیا جو پاکستان عالمی برادری تے زور ݙیندے جو او بھارت کوں بھارتی غیر قانونی زیرِ قبضہ جموں تے کشمیر اچ انسانی حقوق دی خلاف ورزیاں کوں فوری طور تے روکݨ تے کشمیری عوام دے حقِ خود ارادیت دے حصول کیتے آپݨے عہد دی تکمیل تے آمادہ کرے، ڄہرا متعلقہ اقوامِ متحدہ دی سلامتی کونسل دی قرارداداں دے عین مطابق اے۔