حج 2027ء کیتے پرائیویٹ حج سکیم دے تحت بکنگ دا عمل “پاک حج ایپ” تے حج پورٹل دے ذریعے جاری

اسلام آباد۔ 14 ستمبر (اے پی پی) وزارتِ مذہبی امور تے بین المذاہب ہم آہنگی دے ترجمان آکھیا جو حج 2027ء کیتے پرائیویٹ حج سکیم دے تحت بکنگ دا عمل “پاک حج ایپ” تے حج پورٹل دے ذریعے جاری اے ڄݙاں جو ہݨ تائیں 7 ہزار توں ودھ عازمین دی بکنگ مکمل تھی ڳئی اے۔ ترجمان دے مطابق پرائیویٹ حج سکیم دے تحت مجموعی طور تے 64 ہزار حج نشستاں اڄاں دستیاب ہن ڄݙاں جو بکنگ دی چھیکڑی تاریخ 20 نومبر 2026ء مقرر کیتی ڳئی اے۔ عازمینِ حج مقررہ تاریخ تائیں آپݨی پسند دے حج پیکیج دا انتخاب کر تے بکنگ مکمل کر سڳدن۔ ترجمان ݙسایا جو پرائیویٹ حج سکیم دے تحت 25 منظم کمپنیاں عازمین کیتے 2 ہزار توں ودھ مختلف حج پیکیجز متعارف کرائن، ڄنہاں اچ مختلف دورانیاں تے سہولتاں آلے پیکیجز شامل ہن۔ حج پورٹل دے ذریعے ہݨ تئیں 25 منظم کمپنیاں کوں 6 ارب 88 کروڑ روپے دی رقم موصول تھی ڳئی اے۔ ترجمان مذہبی امور عازمینِ حج کوں خبردار کریندیں ہوئیں آکھیا جو پرائیویٹ حج دی بکنگ تے واجبات دی ادائیگی صرف “پاک حج ایپ” تے سرکاری حج پورٹل دے ذریعے کیتی ونڄے۔عوام کہیں بندے، ایجنٹ یا کمپنی کوں پورٹل دے علاوہ کہیں ٻئے ذریعے توں حج واجبات جمع نہ کراون۔ ترجمان آکھیا جو عازمینِ حج کہیں وی فراڈ یا جعل سازی توں محفوظ رہوݨ کیتے حج پیکیج تے ادائیگی دے سارے مراحل سرکاری نظام دے ذریعے مکمل کرن تے غیر مجاز افراد یا ذرائع کوں رقم فراہم کرݨ توں گریز کرن۔