پاکستان توں یورپ غیر قانونی امیگریشن اچ 64 فیصد ڳھٹکی، عالمی اداریاں ولوں مؤثر اقدامات دا اعتراف

اسلام آباد۔ 17 ستمبر (اے پی پی) وفاقی وزیرِ داخلہ محسن نقوی دی قیادت اچ انسدادِ انسانی سمگلنگ کیتے کیتے ڳئے مؤثر اقدامات دے نتیجے اچ پاکستان توں یورپ دی جانب غیر قانونی امیگریشن اچ 64 فیصد ریکارڈ کمی واقع تھئی جݙانجو انٹرنیشنل سنٹر فار مائیگریشن پالیسی ڈویلپمنٹ (ICMPD) تے یورپی یونین دی بارڈر اینڈ کوسٹ گارڈ ایجنسی ”فرنٹیکس” غیر قانونی امیگریشن دے سدِ باب کیتے پاکستان دے موثر تے بروقت فیصلیاں کوں سراہندے ہوئیں مکمل تعاون دی یقین دہانی کروائی اے۔ وفاقی وزیرِ داخلہ محسن نقوی نال انٹرنیشنل سنٹر فار مائیگریشن پالیسی ڈویلپمنٹ دی ڈائریکٹر جنرل سوزین راب تے فرنٹیکس دے ایگزیکٹو ڈائریکٹر ہانس لیئتنس اتھاں انڄ انڄ ملاقاتاں کیتیاں ڄیندے دوران غیر قانونی امیگریشن دی روک تھام اتے بارڈر مینجمنٹ کوں مؤثر بݨاوݨ کیتے آپسی تعاون کوں مزید مضبوط کرݨ دے عزم دا اعادہ کیتا ڳیا۔ آئی سی ایم پی ڈی دے وفد وفاقی تحقیقاتی ادارے (FIA) دی رسک اینالیسس رپورٹ دی خاص طور تے تعریف کیتی تے مکمل خاتمے دے ہدف دے حصول اچ پاکستان دے نال ہر ممکن اشتراک جاری رکھݨ دا عزم ظاہر کیتا۔ وفاقی وزیرِ داخلہ محسن نقوی ایں موقع تے ڳالھ مہاڑ کریندیں ہوئیں آکھیا جو وسائل دی کمی دے باوجود غیر قانونی امیگریشن اچ 64 فیصد ڳھٹکی ہک انتہائی کٹھن ٹاسک ہئی ڄینکوں پوری ٹیم ݙینہہ رات محنت کر تے ممکن بݨایا۔ انہاں واضح کیتا جو پاکستان دا اگلا ہدف غیر قانونی امیگریشن دا 100 فیصد خاتمہ اے ڄینکوں ہر صورت حاصل کیتا ویسے، ایں مسئلے نال نٻڑݨ کیتے قانونی امیگریشن دی نویاں راہواں کھولݨ وی ضروری اے۔