وفاقی وزیرِ تعلیم دی پیرا دی ڈیجیٹل تبدیلی دی تحسین، شفافیت تے ڈیجیٹل خدمات جدید طرزِ حکمرانی دی ناگزیر ضرورت ہن

اسلام آباد۔ 17 ستمبر (اے پی پی) پرائیویٹ ایجوکیشنل انسٹی ٹیوشنز ریگولیٹری اتھارٹی (ICT-PEIRA) ’’پیرا ڈیجیٹل سروسز‘‘ دا باقاعدہ آغاز کر ݙتے، ڄو وفاقی دارالحکومت دے نجی تعلیمی شعبے اچ پیپر لیس ریگولیشن، شفافیت، ادارہ جاتی کارکردگی تے عوامی سہولت کاری آلے پاسے ہک اہم پیش رفت اے۔ افتتاحی تقریب فیڈرل بورڈ آف انٹرمیڈیٹ اینڈ سیکنڈری ایجوکیشن اسلام آباد دے آڈیٹوریم اچ تھئی۔ وفاقی وزیر برائے تعلیم و پیشہ ورانہ تربیت ڈاکٹر خالد مقبول صدیقی تقریب اچ بطور مہمانِ خصوصی شرکت کیتی۔ تقریب اچ اعلیٰ سرکاری افسران، ماہرینِ تعلیم، نجی تعلیمی اداروں دے نمائندگان تے اسلام آباد نال تعلق رکھݨ آلی ٻئی معزز شخصیات شرکت کیتی۔ تقریب نال خطاب کریندیں ہوئیں وفاقی وزیرِ تعلیم پیرا ولوں جامع ڈیجیٹل خدمات دے آغاز کوں سراہیا اتے ٹیکنالوجی دے ذریعے ریگولیٹری نظام کوں زیادہ شفاف، قابلِ رسائی تے عوام دوست بݨاوݨ تے اتھارٹی دیاں کوششاں دی تعریف کیتی۔ وفاقی وزیر آکھیا جو شفافیت چنڳی حکمرانی تے جمہوریت دی بنیادی اساس اے اتے جدید ٹیکنالوجی اداریاں اچ شفافیت، جوابدہی تے عوامی اعتماد کوں فروغ ݙیوݨ دا مؤثر ذریعہ اے۔

انہاں آکھیا جو آن لائن رجسٹریشن و تجدید، ای لائسنسنگ، شکایات دے ازالے، اسناد دی تصدیق تے مائیگریشن جہیاں آن لائن سہولیات ہݨ محض ایک آپشن نئی بلکہ جدید ریگولیٹری نظام دی ناگزیر ضرورت ہن۔ شہریاں تے تعلیمی اداریاں کوں ضروری سرکاری خدمات دے حصول کیتے غیر ضروری کاغذی کارروائی، تاخیر تے دفاتر دے ولا ولا چکر لاوݨ دی ضرورت نئیں ہووݨی چاہیدی۔ ایں موقع تے چیئرمین پیرا ڈاکٹر غلام علی ملاح پیرا دے اصلاحاتی تے ڈیجیٹل ٹرانسفارمیشن ایجنڈے دی تکمیل اچ مسلسل رہنمائی، بھرپور تعاون تے حوصلہ افزائی تے وزارتِ وفاقی تعلیم و پیشہ ورانہ تربیت دا شکریہ ادا کیتا۔ ڈاکٹر غلام علی ملاح آکھیا جو جدید دور اچ ریگولیٹر دا کردار صرف قوانین دے نفاذ تائیں محدود نئیں ہووݨا چاہیدا بلکہ ایں کوں سہولت کار دا کردار وی ادا کرݨا چاہیدے۔

انہاں آکھیا، ’’ریگولیٹرز کوں فسیلیٹیٹرز وی ہووݨا چاہیدے۔ اساݙی ذمہ داری اے جو تعلیمی اداریاں کوں سہولت فراہم کروں تے ایں دے نال معیاری تعلیم، ادارہ جاتی جوابدہی تے حکومتی پالیسیاں تے مؤثر عمل درآمد کوں وی یقینی بݨاؤں۔ انہاں وفاقی دارالحکومت دے تعلیمی نظام اچ نجی شعبے دے اہم کردار کوں اجاگر کریندیں ہوئیں آکھیا جو اسلام آباد اچ مجموعی طلبہ دے تقریباً 60 فیصد داخلے نجی تعلیمی اداریاں اچ ہن۔ ایں وݙے تعلیمی حصے دے پیشِ نظر نجی اداروں دے نال مثبت تے تعمیری اشتراک، مؤثر ریگولیشن تے کوالٹی اشورنس اسلام آباد دے تعلیمی نظام کوں مزید مضبوط بݨاوݨ کیتے ناگزیر ہن۔ چیئرمین پیرا ٻیا آکھیا جو ڈیجیٹل ٹرانسفارمیشن محض ٹیکنالوجی دی تبدیلی نئیں بلکہ ہک ادارہ جاتی اصلاح اے، ڄیندا بنیادی مقصد ریگولیٹری خدمات کوں تیز، آسان، شفاف تے ہر شہری دی دسترس اچ گھن آوݨا اے۔ ایں اقدام نال کاغذی کارروائی اچ نمایاں کمی، سرکاری دفاتر دے غیر ضروری دوریاں دا خاتمہ تے اسٹیک ہولڈرز کوں زیادہ تیز رفتار تے جوابدہ ریگولیٹری ماحول فراہم کرݨ اچ مدد ملسی۔ ’’پیرا ڈیجیٹل سروسز‘‘ دا آغاز ڈیجیٹل گورننس، شفافیت، کاروبار و ادارہ جاتی امور اچ آسانی، معیارِ تعلیم دی ضمانت تے شہریاں تے مرکوز عوامی خدمات کیتے اتھارٹی دے وسیع تر عزم دی عکاسی کریندے۔ اے اقدام ٹیکنالوجی دے ذریعے سرکاری اداریاں کوں جدید خطوط تے استوار کرݨ تے عوام کیتے حکومتی خدمات کوں ٻیا سوکھا تے قابلِ رسائی بݨاوݨ دے حکومتی وژن نال وی ہم آہنگ اے۔