شعبہ توانائی دی تنظیمِ نو تے مالیاتی اصلاحات نال معاشی استحکام، روشن ڈیجیٹل اکاؤنٹس سکیم اڳوں ودھدی پئی اے، وزیر خزانہ محمد اورنگزیب

لندن۔ 17 ستمبر (اے پی پی) شعبہ توانائی دی تنظیمِ نو تے مالیاتی اصلاحات نال معاشی استحکام آندا پئے جݙاں جو روشن ڈیجیٹل اکاؤنٹ سکیم کامیابی نال اڳوں ودھدی پئی اے۔ وفاقی وزیرِ خزانہ و محصولات محمد اورنگزیب لندن اچ ترسیلاتِ زر تے روشن ڈیجیٹل اکاؤنٹس روڈ شو نال خطاب کریندے آکھیا جو مالیاتی نظم و ضبط، ٹیکس اصلاحات، نجکاری تے توانائی دے شعبے دی تنظیمِ نو دے نتیجے اچ ملکی معیشت اچ پائیدار استحکام پیدا تھیندا پئے۔ پاکستان ہݨ اپݨے مالیاتی شراکت داراں دے نال امداد دے بجائے تجارت تے سرمایہ کاری دے بہاؤ تے زیادہ توجہ مرکوز کریندا پئے۔ وزیرِ خزانہ ݙسایا جو مالیاتی محاذ تے گزریل 22 سال اچ ساریں توں گھٹ مالیاتی خسارہ ریکارڈ کیتا ڳیا تے مسلسل ترائے سال توں پرائمری سرپلس حاصل کیتا ویندا پئے۔ زرمبادلہ دے ذخیرے صرف ݙو ہفتے دے کور توں ودھ تے تقریباً ترائے مہینے دی درآمدات دے برابر پڄ چکئن، جیڑھا ادارہ جاتی سرمایہ کاراں کیتے ھک اہم سنگِ میل اے۔ انہاں آکھیا جو ایف بی آر کوں جدید، شفاف تے ٹیکنالوجی تے مبنی ادارہ بݨاوݨ کیتے تبدیلیاں کیتیاں ویندیاں پئن۔ 25 توں 26 کروڑ آبادی آلا ملک بنیادی مالی ضروریات کیتے ٻاہرلے اداریں تے انحصار نئیں کر سڳدا۔ اضافی ٹیکس عائد کرݨ دے بجائے انفورسمنٹ تے لیکیجز مکاوݨ تے توجہ ݙتی ڳئی اے، جیندے نتیجے اچ گزریل ݙو سال دے دوران ٹیکس آمدݨ اچ تقریباً 40 فیصد ودھارا تھئے۔ توانائی تے نجکاری دے شعبے تے ڳالھ کریندے وزیرِ خزانہ ݙسایا جو 27 سرکاری ادارے نجکاری کمیشن دے حوالے کیتے ڳئن۔ قومی ایئر لائن (پی آئی اے) دی نجکاری اچ ݙو وݙے پاکستانی گروپس بغیر کہیں غیر ملکی شراکت دار دے 1.2 ارب ڈالر دیاں ٻولیاں پیش کیتیاں، جیندے اچ کامیاب ٻولی تقریباً 600 ملین ڈالر رہی۔ ایں توں علاوہ ڈسکوز، ایئر پورٹس تے انشورنس کمپنیاں وی نجکاری دے عمل دا حصہ ہن۔