وزیراعظم دے مشیرنجکاری محمد علی دا اسلام آباد بزنس سمٹ 2026ء معاشی ترقی کیتے مستقبل دے روڈ میپ تے اظہارِ خیال

اسلام آباد۔ 17 ستمبر (اے پی پی) وزیراعظم دے مشیر نجکاری و چیئرمین پرائیویٹائزیشن کمیشن تے پبلک پرائیویٹ پارٹنرشپ اتھارٹی (P3A) اسلام آباد بزنس سمٹ 2026ء اچ کاروباری رہنماواں نال خطاب دے دوران “(اگلا قدم ۔پاکستان اچ ترقی، سرمایہ کاری تے مسابقت دا اڳلا مرحلہ)” (The Next Move- Pakistan’s Next Phase of Growth, Investment and Competitiveness) دے موضوع تے ڳالھ کریندے معاشی ترقی دی لوڑھ تے زور ݙیندے آکھیا جو معاشی ترقی کیتے سٹریٹجک جنریشن، جدت طرازی، نجی شعبے کوں فعال کرݨا تے قابلِ اعتماد عوامی پالیسی فریم ورک دی تیاری انتہائی اہم اے۔ محمد علی اڄوکے میکرو اکنامک فیدے تے سخت فیصلیں دے ذریعے حاصل تھیوݨ آلے استحکام کوں وی اجاگر کیتا تے آکھیا جو استحکام ھک پائیدار اقتصادی ترقی کیتے محض ھک لانچ پیڈ اے۔ انہاں 2050ء تئیں 390 ملین تئیں پڄݨ دی پیش گوئی کیتی ڳئی آبادی کوں سہارا ݙیوݨ کیتے ریاست تے نجی شعبے دے تعلقات کوں تبدیل کرݨ تے زور ݙتا۔ مشیر نجکاری آکھیا جو ریاست کوں ایجھیں شعبیں دی قیادت، ریگولیٹ، شراکت داری، فعالیت تے حکمتِ عملی توں ٻہر نکلݨا چاہیدے جتھاں پرائیویٹ انٹرپرائز بہتر قیمت ݙے سڳدن۔ انہاں آکھیا جو نجکاری صرف ملکیت دی منتقلی نئیں بلکہ روایتی انتظام دی طرفوں محدود معاشی قدر کوں وسعت ݙیوݨ دا طریقہ کار اے۔ انہاں آکھیا جو پی آئی اے دی پیچیدہ ٹرانزیکشن توں حاصل تھیوݨ آلے تجربیں مستقبل دی نجکاری تے پبلک پرائیویٹ پارٹنرشپس دے حوالے نال پائپ لائن اچ موجود ٹرانزیکشنز کیتے رہنمائی کریسن تاں جو جدید انفراسٹرکچر تے خدمات ݙتیاں ونڄ سڳن۔ اپݨے خطاب دے دوران نجکاری دے مشیر پاکستان دی اقتصادی تجدید کیتے درکار ترائے ساختی تبدیلیاں دا خاکہ وی پیش کیتا تے آکھیا جو اقتصادی ترقی دے روایتی طریقے کوں تبدیل کرݨ، کھپت تے ٻاہرلی فنانسنگ توں سرمایہ کاری دے حصول، پیداواریت اچ ودھارا تے نجی سرمایہ کاری دا ودھارا ضروری اے۔