وفاقی وزیرِ پٹرولیم تے خیبرپختونخوا دے وزیرِ توانائی دی ملاقات

اسلام آباد۔ 17 ستمبر (اے پی پی) وفاقی وزیرِ پٹرولیم علی پرویز ملک تے خیبرپختونخوا دے وزیرِ توانائی و برقیات نذیر احمد عباسی ملاقات دے دوران وفاقی تے صوبائی حکومتاں وچال بہتر رابطہ کاری، توانائی دے شعبے اچ زیادہ سرمایہ کاری، ایکسپلوریشن اینڈ پروڈکشن (ای اینڈ پی) سرگرمیاں کیتے سکیورٹی اچ بہتری تے خیبرپختونخوا دے عوام کیتے توانائی تئیں بہتر رسائی دے عزم دا اعادہ کیتے۔ ملاقات اچ سیکرٹری توانائی و برقیات، حکومتِ خیبرپختونخوا وی موجود ہن۔ وفاقی وزیر خیبرپختونخوا دے وزیر کوں ملک اچ تیل دی موجودہ فراہمی تے عالمی پٹرولیم مارکیٹ دے لہہ چڑھ دے اثرات تے بریفنگ ݙیندے آکھیا جو وفاقی حکومت بلاتعطل توانائی ݙیوݨ کیتے پرعزم اے۔ انہاں ݙسایا جو سکیورٹی فورسز دے تعاون نال صوبے اچ ای اینڈ پی سرگرمیاں دے تحفظ کیتے جامع منصوبہ بݨایا ویندا پئے، جیندے نال توانائی دی سکیورٹی تے صوبے دی رائلٹی آمدݨ اچ ودھارا تھیسی۔ صوبائی وزیر تسلیم کیتا جو سکیورٹی دے مسئلے حل کرݨ ضروری ہن تے ایں ضمن اچ مکمل تعاون دا یقین ݙیوائے۔ خیبرپختونخوا دے وزیر ݙسایا جو صوبے اچ کھو دی کامیابی دی شرح عالمی اوسط توں زیادہ اے، جو سرمایہ کاری دی نمایاں صلاحیت کوں ظاہر کریندی اے۔ گیس دے مسئلیں تے وفاقی وزیر آکھیا جو عالمی منڈی دیاں رکاوٹاں پاروں سپلائی تے دٻاؤ اے تے حالات بہتر تھیندے ہی تقسیم دے انتظامات دا نویں سروں جائزہ ڳھدا ویسے۔ صوبائی وزیر پہاڑی تے پرے دے علاقیں کیتے 10 فیصد ایل پی جی کوٹے توں استفادہ کریندے ہوئیں ھک ایل پی جی کمپنی قائم کرݨ دی تجویز ݙتی، جیندے تے پٹرولیم ڈویژن دے حکام تفصیلات شیئر کرݨ دا یقین ݙیوائے۔ وفاقی وزیر علی پرویز ملک حکام کوں خیبرپختونخوا دے نال نیڑے رابطے دی ہدایت کیتی تے ایں بات تے زور ݙتا جو عوام دی فلاح دے رستے اچ سیاست حائل نی ہووݨی چاہیدی، جیندے توں صوبائی وزیر نذیر احمد عباسی وی مکمل اتفاق کیتا۔