وکلا دا بنیادی مقصد اپݨے پیشے دی عزت، وقار تے اخلاقی اقدار دا تحفظ ہووݨا چاہیدے، وفاقی وزیرِ قانون سینیٹراعظم نذیر تارڑ

راولپنڈی۔ 17 ستمبر(اے پی پی) وفاقی وزیرِ قانون و انصاف سینیٹر اعظم نذیر تارڑ آکھیے جو حکومت تے وکلا دا رشتہ حکومتاں تے وزارتاں دا نی، بلکہ پیشہ ورانہ وابستگی دا اے، وکیل دا یونیفارم ایں دی شخصیت دا حصہ اے تے یونیفارم دی عزت اچ ہی وکیل دی عزت اے، وکلا دا بنیادی مقصد اپݨے پیشے دی عزت، وقار تے اخلاقی اقدار دا تحفظ ہووݨا چاہیدے۔ اے ڳالھ انہاں ہائیکورٹ بار ایسوسی ایشن راولپنڈی اچ وکلا نال خطاب کریندے آکھی۔ وفاقی وزیرِ قانون آکھیا جو انہاں دا ہمیشہ موقف ریہے جو بار دی سیاست کوں قومی سیاست توں انڄ رکھیا ونڄے، سیاست تے سیاسی وابستگی ہر شخص دا آئینی حق اے، ہر شخص دا کہیں نہ کہیں سیاسی طور تے لگاؤ ہوندے تاں جو بار تے وکلا دے معاملیں اچ پیشہ ورانہ مفادات تے وقار کوں مقدم رکھیا ونڄݨا چاہیدے۔ اعظم نذیر تارڑ آکھیا جو اساں او لوک ہیسے جنہاں اپݨے ہی گھر دی صفائی تے حفاظت کرݨ چھوڑ ݙتا ہئی، اساݙا پہلا مقصد اپݨے گھر دی حفاظت تے بہتری اے، وفاقی وزیرِ قانون آکھیا جو راولپنڈی تے اسلام آباد بارز توں انہاں کوں طاقت ملدی اے، پی ڈی ایم دے دورِ حکومت اچ لائرز پروٹیکشن ایکٹ بݨایا ڳیا جݙاں جو وفاقی حکومت توں بار کونسلز دی سالانہ گرانٹ ودھا تے 80 کروڑ روپے کر ݙتی ڳئی اے جیندا حساب موجود اے، پنجاب حکومت وی صوبائی بارز دی گرانٹ ڈبل کر تے ھک ارب روپے تئیں کر ݙتی اے۔ 26ویں تے 27ویں آئینی ترمیم تے ڳالھ کریندے اعظم نذیر تارڑ آکھیا جو ایں معاملے اچ اساں 20 سال قبل ہی سکھ ڳھدا ہئی۔ پاکستان ھک فیڈریشن اے، کیا حرج ہئی جو پہلے ہی وفاقی آئینی عدالت قائم کر ݙتی ویندی جیندے اچ ہر صوبے دی برابر نمائندگی ہوندی۔ انہاں آکھیا جو کہیں صوبے توں چار ججز نئیں تھی سڳدے، ہر صوبے توں ترائے تے ھک جج اسلام آباد توں ہوسی۔ آئین دی تشریح دے معاملے آئینی عدالت دے سپرد کر ݙتے ڳئن جݙاں جو 27ویں ترمیم اچ اے ڳالھ واضح کر ݙتی ڳئی اے جو کئیں عدالت کیہڑے مقدمات دی سماعت کرݨی اے، ہݨ ایں بحث کوں مزید الجھاوݨ دی لوڑھ کائنی۔