سیکرٹری خارجہ سفیر آمنہ بلوچ دا ترائے ݙہاکیں تے محیط سفارتی کیریئرمُک ڳیا

اسلام آباد۔ 17 ستمبر(اے پی پی) سیکرٹری خارجہ آمنہ بلوچ دا ترائے ݙہاکیں تے محیط سفارتی کیریئر اڄ خمیس کوں مک ڳئے، انہاں دی جاہ عاصم افتخار اے عہدہ سنبھیسن۔ ترجمان دفترِ خارجہ سجاد حیدر خان اپݨی ہفتہ وار پریس بریفنگ اچ اعلان کیتا جو سیکرٹری خارجہ آمنہ بلوچ دیاں خدمات دی تعریف کریندوں جو ترائے ݙھاکیں دے پاکستان دی خدمت دے اپݨے سفر دے اختتام دے بعد خمیس کوں اپݨا سفارتی کیریئر مکمل کرتے سبکدوش تھیندیاں پئن۔ انہاں آکھیا جو اپݨی شاندار مدتِ ملازمت دے دوران سفیر آمنہ بلوچ اپݨے پیشہ ورانہ رویے، عزم تے مثالی قیادت دے ذریعے پاکستان دی خارجہ پالیسی تے سفارتی خدمت اچ قیمتی خدمات انجام ݙتن۔ سفیر آمنہ بلوچ 11 ستمبر 2024ء کوں پاکستان دے 33ویں سیکرٹری خارجہ دا عہدہ سنبھالیا ہئی۔ انہاں دی چھیکڑی تقرری مئی 2023ء توں ستمبر 2024ء تئیں بیلجیئم، لکسمبرگ تے یورپی یونین اچ پاکستان دی سفیر دے طور تے ہئی۔ ایں توں پہلے او 2019ء توں 2023ء تئیں ملائیشیا اچ پاکستان دی ہائی کمشنر تے 2014ء توں 2017ء تئیں چین دے چینگدو اچ قونصل جنرل رہ چکئن۔ سفیر آمنہ بلوچ 1991ء اچ وزارتِ خارجہ اچ شمولیت اختیار کیتی۔ وزارت دے ہیڈکوارٹر تے انہاں سیاسی، انتظامی تے پروٹوکول ڈویژنز اچ مختلف عہدیں تے خدمات انجام ݙتیاں۔ انہاں وزیراعظم دے دفتر اچ اہم عہدیں تے وی کم کیتا تے 2018-2019ء اچ ایڈیشنل سیکرٹری دے طور تے خدمات انجام ݙتیاں۔ ایں توں پہلے نائب وزیراعظم تے وزیرِخارجہ اسحاق ڈار اعلان کیتا ہئی جو سفیر آمنہ بلوچ دی جاہ سفیر عاصم افتخار گھنسن جیڑھے ایں ویلھے اقوامِ متحدہ اچ پاکستان دے مستقل نمائندے دے طور تے خدمات انجام ݙیندے پئن۔ انہاں مزید آکھیا جو سفیر آمنہ بلوچ ریٹائرمنٹ دے بعد پاکستان دی ترکیہ اچ سفیر دا عہدہ سنبھیسن تے یقین ظاہر کیتا جو او اپݨے نویں کردار اچ وی پاکستان دی خدمت جاری رکھیسن۔