اسلام آباد تے دھاوا ٻولݨ دی اجازت نا ݙتی ویسی، عدالتی احکامات نا منݨ والیاں دے خلاف توہینِ عدالت دی کارروائی کیتی ویسی، وزیرِ داخلہ محسن نقوی

اسلام آباد۔18 ستمبر (اے پی پی)وفاقی وزیرِ داخلہ محسن نقوی واضح کیتے جو اسلام آباد ہائی کورٹ دے تفصیلی فیصلے دے بعد وفاقی دارالحکومت تے کہیں صورت دھاوا ٻولݨ یا یلغار دی اجازت نا ݙتی ویسی۔ انہاں چتاوݨی ݙتی جو عدالتی احکامات دی خلاف ورزی کرݨ والیاں دے خلاف فوری طور تے توہینِ عدالت دی کارروائی کیتی ویسی۔ وزیرِ مملکت داخلہ سینیٹر طلال چوہدری تے ایڈووکیٹ جنرل دے کٹھے اسلام آباد اچ پریس کانفرنس نال کریندے ہوئیں وزیرِ داخلہ آکھیا جو سکیورٹی فورسز اتے قانون نافذ کرݨ والے اداریاں کوں ہر ممکن طریقے نال احتجاج کوں روکݨ دی مکمل تیاری تے واضح ہدایات ݙے ݙتیاں ڳئن۔ انہاں ݙو ٹوک انداز اچ آکھیا جیکر مظاہرین فائرنگ کیتی یا قانون ہتھ اچ ڳھدا تاں فورسز دے جوان خاموش تماشائی نہ ٻݨسن ٻھل موثر ولدا ݙیسن۔ ملک اچ امن تے امان دی صورتِ حال تے فورسز دیاں قربانیاں دا حوالہ ݙیندے محسن نقوی آکھیا جو ہک پاسے قوم شہداء دے جنازے چیندی پئی اے اتے ݙوجھے پاسے دھرنیاں تے یلغار دیاں تیاریاں کیتاں ویندیاں پئن۔ انہاں خیبر پختونخوا حکومت اتے وزیرِ اعلیٰ تے زور ݙتا جو او اسلام آباد دو مارچ تے وسائل ونڄاوݨ دی بجائے اپݨے صوبے اچ دہشتگردی مکاوݨ اتے قانون دی حکمرانی تے توجہ ݙیوݨ اے۔ وزیرِ داخلہ سیاسی جلسیاں اتے جتھیاں دی چڑھائی اچ فرق واضح کریندے آکھیا جو احتجاج ہر سیاسی جماعت دا جمہوری حق اے، ٻھل اے اپݨے اپݨے علاقیاں اتے صوبیاں دی حدود اچ ہووݨا چاہیدے نہ کہ دارالحکومت دے گھیراؤ نال نظامِ زندگی مفلوج کیتا ونڄے۔ انہاں آکھیا ڄیکر ایں کشیدگی اچ کوئی ہک وی جانی نقصان تھیا تاں ایںدے براہِ راست ذمہ دار احتجاج دے آرگنائزرز ہوسن۔ انہاں اپوزیشن دے ذمہ دار رہنماواں توں اپݨے فیصلے تے نظرثانی کرݨ دی اپیل کریندے آکھیا جو تصادم دی ایں سیاست نال ملک دا صرف نقصان تھیسی۔