سینیٹر محمد اسحاق ڈار دا ترقی پذیر ملکاں اچ تکنیکی و صنعتی استعداد ودھاوݨ تے زور

نیویارک۔25 ستمبر(اے پی پی)نائب وزیراعظم و وزیرِ خارجہ سینیٹر محمد اسحاق ڈار ترقی پذیر ملکاں اچ وبائی بیماریاں نال نمٹݨ دی صلاحیت ودھاوݨ کیتے قابلِ پیش گوئی مالی معاونت، ٹیکنالوجی دی منتقلی اتے سائنسی، تکنیکی و صنعتی استعداد ودھاوݨ تے زور ݙیندے آکھیے جو مستقبل اچ وبائی بیماریاں نال موثر انداز اچ نمٹݨ کیتے ویکسین اتے ضروری طبی سہولیات تئیں مساوی رسائی، وبائی بیماریاں بارے معلومات دی ویلھے سر فراہمی اتے عالمی تعاون ضروری اے۔ دفترِ خارجہ دی سماجی رابطے دے پلیٹ فارم ’’ایکس‘‘ تے پوسٹ دے مطابق اقوامِ متحدہ دی جنرل اسمبلی دے 81ویں اجلاس دے موقع تے ’’وبائی بیماریاں دی روک تھام، تیاری تے ردِعمل‘‘ دے موضوع تے اعلیٰ سطح اجلاس نال خطاب کریندے نائب وزیراعظم محمد اسحاق ڈار کووڈ-19 دی وبا اچ پاکستان دی حکومت اتے عوام دی مشترکہ حکمتِ عملی کوں اڳونہا کیتا ڄیندے اچ سمارٹ لاک ڈاؤن، ٹیسٹنگ، متاثرہ افراد نال رابطے اچ آوݨ والیاں دا پتا لاوݨ، سماجی تحفظ اتے مختلف شعبیاں تے مشتمل ’’ون ہیلتھ‘‘ طریقہِ کار کوں اپناوݨ شامل ہئی۔ نائب وزیراعظم عالمی ادارہِ صحت دے وبائی بیماریاں دے معاہدے دی منظوری دا خیرمقدم کیتا اتے ترقی پذیر ممالک اچ وبائی بیماریاں نال نمٹݨ کیتے مالی وسائل دی فراہمی، ٹیکنالوجی دی منتقلی اتے سائنسی، تکنیکی و پیداواری صلاحیتاں ودھاوݨ تے زور ݙتا۔ انہاں مستقبل اچ وبائی بیماریاں نال نمٹݨ کیتے ویکسین اتے ضروری طبی اقدامات تئیں منصفانہ رسائی، وبائی بیماریاں دے ڈیٹا دی ویلھے سر فراہمی اتے عالمی ادارہِ صحت دی قیادت اچ مضبوط، جامع اتے کثیر الجہتی عالمی ردِعمل تے وی زور ݙتا۔