حکومت عوام کوں مستند معلومات ݙیوݨ، شفافیت دے ودھارے تے معلومات تئیں رسائی دے حق دے تحفظ کیتے پرعزم اے، وزیراعظم شہباز شریف

اسلام آباد۔28 ستمبر(اے پی پی) وزیراعظم محمد شہباز شریف عوام دی مستند معلومات تئیں رسائی تے اداریاں ولوں معلومات دی فراہمی دے بنیادی جمہوری حق دی غیر متزلزل توثیق کریندے آکھیے جو حکومت، میڈیا، سول سوسائٹی، تعلیمی ادارے، ٹیکنالوجی دے ماہرین اتے شہری رل تے معلومات دی صحت اتے صداقت دے تحفظ اتے ہک باخبر، ذمہ وار تے شفاف معاشرے سانڳے اپݨا کردار ادا کریسی۔ اے ڳالھ انہاں معلومات تئیں رسائی دے عالمی ݙیہاڑے سانڳے اپݨے سنیہے اچ آکھی اے۔ وزیراعظم آکھیا جو پاکستان اڄ دنیا دے نال ہم آواز تھی تے معلومات تئیں رسائی دے عالمی ݙیہاڑے تے معلومات دی شہریاں تئیں رسائی، اداریں دی طرفوں ایں دی فراہمی تے تبادلے دے بنیادی جمہوری حق دی غیر متزلزل توثیق کریندے۔ ایں سال اے عالمی ݙیہاڑا “ڈیجیٹل دور اچ معلومات دی صحت تے صداقت دا تحفظ: معلوماتی انتشار نال نبڑݨ اچ معلومات تئیں رسائی دا کردار” دے عنوان نال منایا ویندا پئے۔ وزیراعظم آکھیا جو اے موضوع بجا طور تے معلومات دی دستیابی کوں درپیش ہک اہم مسئلے دی نشاندہی کریندے، جیندے اچ غلط تے گمراہ کن معلومات دا کھنڈݨ تے ایں دے نتیجے اچ پیدا تھیوݨ آلے مسئلے شامل ہن۔ انہاں آکھیا جو معلومات تئیں رسائی ہک بنیادی حق تے شفاف، جوابدہ تے باخبر معاشرے دی بنیاد اے، عوام کوں درست، وقتی تے قابلِ اعتماد معلومات ݙیوݨ نہ صرف ریاستی اداریں دی ذمہ داری اے بلکہ اے شہریاں کوں باخبر فیصلے کرݨ تے قومی امور اچ مؤثر کردار ادا کرݨ دے قابل وی بݨیندی اے۔ وزیراعظم آکھیا جو اڄ دے ڈیجیٹل دور اچ ٹیکنالوجی تے سوشل میڈیا معلومات تئیں رسائی کوں پہلے توں کتھائیں ودھ سوکھا بݨا ݙتے، تاں جو غیر مصدقہ، گمراہ کن تے کوڑیاں معلومات دا تکھے کھنڈݨ ہک سنگین چیلنج بݨ چکیے۔ وزیراعظم آکھیا جو غلط تے گمراہ کن معلومات دا کھنڈݨ معاشرے اچ بے یقینی پیدا کرݨ دے نال نال عوام دے اعتماد کوں وی متاثر کر سڳدے، ایں صورتحال اچ معلومات تئیں رسائی دا حق مزید اہمیت اختیار کرڳئے۔ وزیراعظم آکھیا جو مستند تے قابلِ اعتماد معلومات دی وقتی فراہمی، شفافیت، حقائق دی جانچ تے ذمہ دارانہ ابلاغ دے ذریعے معلوماتی انتشار دا مؤثر طور تے مقابلہ کیتا ونڄ سڳدے۔ وزیراعظم آکھیا جو حکومتِ پاکستان عوام کوں درست تے مستند معلومات دی ݙیوݨ ، شفافیت دے ودھارے تے معلومات تئیں رسائی دے حق دے تحفظ کیتے پرعزم اے، اساں جدید ٹیکنالوجی تے ڈیجیٹل ذرائع کوں بروئے کار گھن آندے ریاستی اداریں تے عوام وچال مؤثر رابطے کوں مزید تکڑا بݨاوݨ کیتے اقدامات کریندے پیوں۔ وزیراعظم آکھیا جو معلومات تئیں رسائی دے عالمی ݙیہاڑے دا اے موقع اساکوں ایں عزم دی تجدید دا تقاضا کریندے جو اساں ایہو جیھا ڈیجیٹل تے معلوماتی ماحول تشکیل ݙیوں جتھاں ہر شہری کوں درست، قابلِ اعتماد تے وقتی معلومات تئیں سوکھی رسائی حاصل ہووے تے کوڑیاں و گمراہ کن معلومات دے کھنڈݨ روکݨ کیتے اجتماعی ذمہ داری دا مظاہرہ کیتا ونڄے۔ وزیراعظم آکھیا جو آئینِ پاکستان دا آرٹیکل 19(A) سارے شہریاں کوں عوامی اہمیت دے امور اچ معلومات تئیں رسائی دی ضمانت ݙیندے۔ ایں آئینی ضمانت کوں قانون سازی تے ادارہ جاتی انتظامات دے ذریعے شہریاں کیتے معلومات دے حصول دے مؤثر نظام اچ ڈھالیا ڳئے۔ وزیراعظم آکھیا جو پاکستان انفارمیشن کمیشن شہریاں دے حقِ رسائی کوں یقینی بݨاوݨ دا فورم اے، جیڑھا شہریاں دیاں متعلقہ شکایتاں دا ازالہ وی کریندے۔ سرکاری دفاتر تے اداریں دے ریکارڈ کوں محفوظ کرݨ تے ایں دی رسائی کوں سوکھا بݨاوݨ کیتے ڈیجیٹائزیشن دا عمل وی جاری اے۔ وزیراعظم آکھیا جو میکوں یقین اے جو حکومت، میڈیا، سول سوسائٹی، تعلیمی ادارے، ٹیکنالوجی دے ماہرین تے شہری رل تے معلومات دی صحت و صداقت دے تحفظ تے ہک باخبر، ذمہ دار تے شفاف معاشرے دے قیام اچ اپݨا کردار ادا کریسن۔