”سمارٹ اسلام آباد“ منصوبے دے تحت آندے چھی مہینے اچ 2500 آئی او ٹی ڈیوائسز نصب کیتیاں ویسن، وفاقی وزیرِ آئی ٹی شزہ فاطمہ خواجہ

اسلام آباد۔30 ستمبر (اے پی پی) وفاقی وزیر انفارمیشن ٹیکنالوجی و ٹیلی کمیونیکیشن شزہ فاطمہ خواجہ اعلان کیتے جو ”سمارٹ اسلام آباد“ منصوبے دے تحت آندے چھی مہینے دے دوران وفاقی دارالحکومت اچ 2,500 انٹرنیٹ آف تھنگز (آئی او ٹی) ڈیوائسز نصب کیتیاں ویسن تاں جو شہریاں کوں جدید ڈیجیٹل سہولتاں ݙتیاں تے شہری انتظام کوں خودکار بݨایا ونڄ سڳے۔ او ہواوے سمر آئی سی ٹی ٹریننگ پروگرام مکمل کرݨ آلی اسلام آباد دے سکولاں دیاں طالبات دے اعزاز اچ منعقدہ تقریب نال خطاب تے سنداں ونڈیندیاں پیاں ہن ۔ وفاقی وزیر آکھیا جو جدید ٹیکنالوجی ہݨ ہر شعبۂ زندگی تے شہری سہولتاں ݙیوݨ اچ ناگزیر تھی چکی اے، حکومت شہریاں کوں قطاراں تے دفتری چکراں توں نجات ݙیواوݨ کیتے ون سٹاپ موبائل ایپلیکیشن تے آسان خدمت مراکز دے ذریعے سارے ٻل، ٹیکس تے سرکاری خدمات کوں تکھے ڈیجیٹلائز کریندی پئی اے جیندے نال نال کیپٹل اچ وسیع پیمانے تے آئی او ٹی نیٹ ورک قائم کیتا ویندا پئے۔ شزہ فاطمہ خواجہ تقریب اچ شریک طالبات دی تعریف کریندے آکھیا جو گریڈ 7 توں سیکنڈ ایئر تئیں دیاں گھٹ عمر طالبات گرمیاں دیاں چھٹیاں اچ نہ صرف جدید آئی ٹی ٹریننگ مکمل کیتی بلکہ اوسطاً 25 توں 28 سرٹیفیکیشنز حاصل کیتیاں تے اپݨی عمر توں کتھائیں ودھ  اعلیٰ درجے دے کورسز پاس کرتے دنیا کوں حیران کرݙتے۔ انہاں زور ݙتا جو پاکستان دی 68 فیصد نوجوان آبادی تے 50 فیصد تریمتاں ملک دا ساریں توں ٻیا ڈیجیٹل اثاثہ ہن، ہݨ ویلھا آڳئے جو اساݙے نوجوان محض ٹیکنالوجی دے صارفین بݨ تے نہ رہن بلکہ خود ٹیکنالوجی تخلیق کرݨ آلے پروڈیوسرز تے ڈویلپرزبݨن۔ وفاقی وزیرآکھیا جو جدید دور اچ آئی ٹی تے سائبر سکیورٹی دا براہِ راست تعلق ملکی دفاع و قومی سلامتی نال ڳھنڈیج ڳئے، ایں سلسلے اچ حکومت جامع سائبر سکیورٹی ایکٹ تے نویں پالیسی تے وی تکھی رفتارنال کم کریندی پئی اے۔ انہاں کامیاب طالبات کوں مبارخ ݙیندے سیالے دیاں چھٹیاں اچ وزارتِ آئی ٹی دے پروجیکٹس اچ انٹرن شپ دی پیشکش وی کیتی۔