وفاقی وزیر قومی غذائی تحفظ رانا تنویر حسین نال روس دی زرعی کمپنی شیلکووو ایگروکِم دے وفد دی ملاقات

اسلام آباد۔7 اکتوبر (اے پی پی) وفاقی وزیر قومی غذائی تحفظ و تحقیق رانا تنویر حسین نال روس دی زرعی کمپنی شیلکووو ایگروکِم دے وفد ملاقات کیتی تے پاکستان تے روس وچال زرعی تحقیق، بج، زرعی دوائیں تے جدید ٹیکنالوجی اچ تعاون ودھاوݨ تے ڳالھ کیتی۔ وفاقی وزیر رانا تنویر حسین آکھیا جو پاکستان روس نال زرعی شعبے اچ ٹیکنالوجی ٹرانسفر تے تحقیق تے مبنی شراکت داری چاہندے ،روسی زرعی ٹیکنالوجی تے مصنوعات کوں پاکستان دے مقامی موسمی تے زرعی حالات اچ ازماوݨ ضروری اے۔ انہاں آکھیا جو موسمیاتی تبدیلی دے ودھدے اثرات پاروں کلائمیٹ ریزیلینٹ زرعی ٹیکنالوجیز پاکستان دی اہم لوڑھ ہن، پاکستان زیادہ پیداوار، خشک سالی تے بیماریاں دے خلاف مزاحمت رکھݨ آلے بج دیاں قسماں کوں ودھاوݨ چاہندے۔ انہاں آکھیا جو روس نال بجاں دا تعاون صرف درآمد تئیں محدود نی تھیوݨا چاہیدا، مقامی پیداوار تے ٹیکنالوجی ٹرانسفر کوں ودھارا ݙیوݨا ہوسی۔ انہاں آکھیا جو پاکستان دے زرعی تحقیقاتی ادارے پی اے آر سی تے این اے آر سی روسی زرعی ٹیکنالوجیز، بیجاں تے زرعی دوائیں دی سائنسی جانچ کیتے اہم پلیٹ فارم ݙیسن۔ انہاں آکھیا جو کݨک رہاوݨ دے سیزن دے پیشِ نظر روسی بجاں دے فوری آزمائشی تجربے دے امکانات دا جائزہ ڳھدا ویسے۔ ایں موقع تے ہائبرڈ کݨک سودھے جدید روسی سیڈ ٹیکنالوجیز اچ تعاون دے امکانات وی زیرِ غورآئے۔ وفاقی وزیر رانا تنویر حسین مزید آکھیا جو روس نال مائیکرونیوٹرینٹس تے جدید فرٹیلائزر ٹیکنالوجی اچ تعاون دے وسیع امکانات موجود ہن۔ انہاں آکھیا جو فاسفورس تے ڈی اے پی کھاد تے انحصار گھٹ کرݨ کیتے متبادل غذائی ٹیکنالوجیز دا جائزہ ڳھدا ونڄ سڳدے، پاکستان روسی کمپنیاں کوں مقامی کاروباری شراکت داراں نال بی ٹو بی رابطے اچ سہولت ݙیسی۔انہاں آکھیا جو پاکستان روس دی زرعی کمپنیاں دی سرمایہ کاری، مقامی شراکت داری تے ٹیکنالوجی ٹرانسفر دا خیرمقدم کریسی