انسانی وسائل تے مہارتاں اچ سرمایہ کاری پاکستان دے مستقبل دی ترقی دی بنیاد اے، وفاقی وزیرِ منصوبہ بندی احسن اقبال

اسلام آباد۔7 اکتوبر (اے پی پی) وفاقی وزیرِ منصوبہ بندی، ترقی و خصوصی اقدامات پروفیسر احسن اقبال آکھیے جو پاکستان کوں ترقی دے رستے تے گامزن کرݨ کیتے پالیسیاں دا تسلسل تے سیاسی استحکام ناگزیر اے، انسانی وسائل تے مہارتاں اچ سرمایہ کاری پاکستان دے مستقبل دی ترقی دی بنیاد اے جݙاں جو تعلیم، صحت، غذائیت، صاف پاݨی تے آبادی دے توازن کوں قومی ہنگامی ترجیحات قرار ݙیوݨ دی لوڑھ اے۔ اے ڳالھ انہاں’’اُڑان پاکستان‘‘ دے تحت 11 قومی اقتصادی مشناں اچوں ستویں مشن ’’انسانی وسائل تے مہارتاں دا ودھارا‘‘ دے اجلاس دی صدارت کریندے آکھی۔ وفاقی وزیر آکھیا جو پاکستان کئی واری ترقی دے منصوبے بݨائے، تاں جو سیاسی عدم استحکام پاروں پالیسیاں دا تسلسل متاثر تھئے، اڄ اساݙے سامݨے اے فیصلہ کن سوال اے جو 2047ء اچ آزادی دی سو سالہ تکمیل دے موقع تے پاکستان کتھاں کھڑا تھیسی، اساکوں معرکۂ حق وانگوں معرکۂ ترقی وی جِتݨا اے۔ انہاں آکھیا جو ہݨ صرف منصوبے بݨاوݨ دا ویلھا کائنی بلکہ انہاں تے موثر عملدرآمد یقینی بݨاوݨا ہوسی، بہترین منصوبہ بندی دے نال موثر عملدرآمد ہی ترقی دے اہداف حاصل کرݨ دی ضمانت بݨ سڳدے۔ وزارتِ منصوبہ بندی دا کم بہترین تحقیق تے مبنی منصوبہ بندی ݙیوݨ اے جݙاں جو عملدرآمد متعلقہ شعبیں تے صوبائی حکومتاں کرݨا اے۔ احسن اقبال آکھیا جو اٹھارویں ترمیم دا مقصد سماجی شعبیں اچ بہتری گھن آوݨ ہئی تاں جو اختیارات تلویں سطح تئیں منتقل نہ تھیوݨ پاروں مطلوبہ نتیجے حاصل نی تھی سڳیے۔ عوام کوں بنیادی سہولتاں انہاں دی دہلیز تے ݙیوݨ کیتے انتظامی اصلاحات کرݨیاں ہوسن تے ضلع دی سطح تے بااختیار محکمے قائم کرݨے ہوسن۔ انہاں آکھیا جو ہک صوبائی سیکرٹری پورے صوبے دے مسئلے موثر انداز اچ حل نی کر سڳدا ایں کیتے اختیارات کوں مقامی حکومتاں تئیں منتقل کرݨا ہوسی۔ صوبائی حکومتاں تعلیم، صحت تے ٻئے سماجی شعبیں اچ گورننس ریفارمز گھن آوون تے بہترین صلاحیتاں دے حامل افسران تعینات کرن۔ وفاقی وزیر آکھیا جو پاکستان دی شرحِ خواندگی 63 فیصد اے تے ایں سطح دی شرحِ خواندگی نال ملک مطلوبہ رفتار نال ترقی نھیں کر سڳدا۔ تعلیم، صحت، غذائیت، صاف پاݨی تے آبادی دے توازن جیھے مسئلے سڑکاں تے عمارتاں توں ودھ اہم ہن تے انہاں کوں قومی ایمرجنسی دے طور تے گھنݨا ہوسی۔ انہاں آکھیا جو ودھدی ہوئی آبادی پاکستان کیتے ہک وݙا چیلنج اے، آبادی اچ ودھارا معاشی ترقی دیاں کوششاں کوں متاثر کر سڳدے۔ سماجی اشاریں اچ نمایاں بہتری کیتے گھٹو گھٹ ݙاہ سالاں دا مسلسل تے مربوط نظام درکار اے جݙاں جو سیاسی استحکام دے بغیر طویل المدتی سماجی تے معاشی اہداف حاصل کرݨ اوکھا اے