وزیراعظم شہباز شریف دی بینکاں کیتے ہاؤسنگ فنانس ݙیوݨ سوکھا بݨاوݨ کیتے ٻئے صوبیں کوں پنجاب دی طرز تے اراضی ریکارڈ دی ڈیجیٹلائزیشن تکھی کرݨ دی ہدایت

اسلام آباد۔7 اکتوبر (اے پی پی) وزیراعظم محمد شہباز شریف بینکاں کیتے ہاؤسنگ فنانس ݙیوݨ کوں سوکھا بݨاوݨ کیتے ٻئے صوبیں کوں پنجاب دی طرز تے اراضی ریکارڈ دی ڈیجیٹلائزیشن تکھی کرݨ دی ہدایت کریندے آکھیے جو اراضی ریکارڈ دی ڈیجیٹلائزیشن نال بینکاں کیتے ہاؤسنگ قرضے ݙیوݨ اچ سوکھ تے شفافیت آسی، ایس ایم ایز دی استعداد کار ودھاوݨ، جدید ٹیکنالوجی دے ودھارے، پیداواری صلاحیت اچ ودھارے تے عالمی ویلیو چین نال منسلک کرݨ کیتے سمیڈا موثر اقدامات کرے۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف دی زیرِ صدارت ہاؤسنگ، چھوٹے و درمیانے درجے دے کاروبار تے زرعی شعبے کوں قرضے ݙیوݨ دے حوالے نال اعلیٰ سطحی جائزہ اجلاس تھیا۔ اجلاس اچ قرضیں دے حوالے نال نیشنل بینک آف پاکستان تے فرسٹ ویمن بینک دی کارکردگی دا جائزہ ڳھدا ڳیا۔ وزیراعظم آکھیا جو ہاؤسنگ، زراعت تے ایس ایم ای شعبیں کوں مالی وسائل ݙیوݨ اچ حائل رکاوٹاں دور کرتے قرضیں دے نظام کوں مزید موثر بݨایا ونڄے، چھوٹے و درمیانے درجے دے کاروباری اداریں کوں قرضے ݙیوݨ اچ اچ سہولت کیتے ایس ایم ای پورٹل نومبر دے اختتام تئیں فعال کیتا ونڄے، ایس ایم ای پورٹل دے ذریعے بینکاں دی طرفوں قرضے ݙیوݨ تے لیٹرز آف کریڈٹ (ایل سیز) سودھے کاروباری سہولتاں دی تازہ ترین صورتحال دی براہ راست نگرانی ممکن تھیسی۔ انہاں آکھیا جو ایس ایم ایز دی استعداد کار ودھاوݨ، جدید ٹیکنالوجی دے ودھارے، پیداواری صلاحیت اچ ودھارے تے عالمی ویلیو چین نال منسلک کرݨ کیتے سمیڈا موثر اقدامات کرے، نیشنل بینک آف پاکستان دی ہاؤسنگ فنانس دے شعبے اچ قرضیں دی دی منظوری دی شرح 76 فیصد تھیوݨ قابلِ تحسین اے۔ وزیراعظم نیشنل بینک دے نویں تعینات تھیووݨ آلے صدر کوں ہدایت کیتی جو نیشنل بینک دی کارکردگی ودھاوݨ کیتے بہترین پروفیشنلز دیاں خدمات ڳھدیاں ونڄن تے مطلوبہ نتیجہ نہ ݙیوݨ آلے عملے دے خلاف بلا خوف محکمانہ کارروائی کیتی ونڄے، بینکاں کیتے ہاؤسنگ فنانس ݙیوݨ سوکھا بݨاوݨ کیتے ٻئے صوبے پنجاب دی طرز تے اراضی ریکارڈ دی ڈیجیٹلائزیشن تکھی کرن، اراضی ریکارڈ دی ڈیجیٹلائزیشن نال بینکاں کیتے ہاؤسنگ قرضے ݙیوݨ اچ سوکھ تے شفافیت آسی۔ اجلاس کوں ہاؤسنگ، زرعی شعبے تے چھوٹے و درمیانے درجے دے کاروباری اداریں کوں قرضے ݙیوݨ دے اعداد و شمار پیش کیتے ڳئے۔ اجلاس کوں ݙسایا ڳیا جو وزیراعظم اپݨا گھر سکیم دے تحت ہݨ تئیں 426 ارب روپے مالیت دے 71 ہزار 690 قرضیں دی منظوری ݙتی ونڄ چکی اے، وزیراعظم اپݨا گھر سکیم دے تحت ہݨ تئیں 13,214 لوکاں کوں 76 ارب روپے دے قرضے جاری کیتے ڳئن، اڄوکے سال 125,000 رہائشی یونٹس کیتے 700 ارب روپے دے قرضیں دی فراہمی دا ہدف رکھا ڳئے، زرعی شعبے کیتے قرضیں دا مجموعی حجم 1,352 ارب روپے ہے جیندے توں 34 لکھ 55 ہزار بندے مستفید تھئن، جون 2027ء تئیں زرعی قرضیں دا حجم 1,500 ارب روپے تے مستفید تھیوݨ آلیں دی تعداد 45 لکھ دا ہدف مقرر اے، زرعی شعبے دی مالی وسائل تئیں رسائی ودھا تے کساناں دی پیداواری صلاحیت تے معاشی سرگرمیاں کوں ودھارا ݙتا ویسے، ایس ایم ای شعبے دے 3 لکھ 50 ہزار کاروباری لوکاں کوں 1,137 ارب روپے دے قرضے ݙتے ڳئن، جون 2027ء تئیں ایس ایم ای شعبے دے قرضیں دا حجم 1,500 ارب روپے تے قرض حاصل کرݨ آلے کاروباری اداریں دی تعداد 5 لکھ 65 ہزار دا ہدف مقرر اے، ایس ایم ایز کوں مالی وسائل تئیں سوکھی رسائی، جدید ٹیکنالوجی اچ سرمایہ کاری تے عالمی منڈیاں اچ مسابقت دے قابل بݨاوݨ کیتے اقدامات جاری ہن، ایس ایم ایز کیتے نظرثانی شدہ ضوابط تے ہاؤسنگ فنانس دے طریقہ کار کوں مزید سوکھا تے موثر بݨاوݨ کیتے اقدامات کیتے ویندے پئن۔ اجلاس کوں قرضے ݙیوݨ اچ مشترکہ رسک شیئرنگ، سپلائی چین فنانسنگ دے ودھارے ، مستند ڈیٹا شیئرنگ تے ٻئے جاری اقدامات تے بریفنگ ݙتی ڳئی۔ اجلاس کوں ݙسایا ڳیا جو چھوٹے قرضیں دے حصول کیتے صارفین کوں بینک برانچاں دے چکر لاوݨ توں نجات ݙیواوݨ کیتے ڈیجیٹل نظام کوں ودھارا  ݙتا ویندا پئے۔ اجلاس اچ وفاقی وزراء رانا تنویر حسین، احد خان چیمہ، محمد اورنگزیب، ریاض حسین پیرزادہ، عطاء اللہ تارڑ، وزیراعظم دے مشیرہارون اختر، گورنر سٹیٹ بینک جمیل احمد تے ٻئے اعلیٰ سرکاری حکام شرکت کیتی