پاکستان تے برطانیہ دا غیر قانونی امیگریشن، نقلی سٹوڈنٹ ویزے تے منشیات دی سمگلنگ روکݨ کیتے مشترکہ اقدامات تے اتفاق

اسلام آباد۔7 اکتوبر (اے پی پی) وفاقی وزیرِ داخلہ محسن نقوی تے وزیرِ مملکت داخلہ طلال چوہدری نال برطانوی وزیرِ مملکت خارجہ امور سٹیفن ڈاؤٹی ملاقات کیتی جیندے اچ پاک برطانیہ تعلقات، سکیورٹی امور تے مشترکہ مفادات دے شعبیں اچ سانجھے تعاون کوں مزید ودھاوݨ تے تفصیلی ڳالھ مہاڑ کیتی ڳئی ۔ ملاقات اچ غیر قانونی امیگریشن، نقلی سٹوڈنٹ ویزیں دے ذریعے برطانیہ ونڄݨ دے رجحان کوں روکݨ ، انسدادِ دہشت گردی تے انسدادِ منشیات کیتے موثر مشترکہ حکمتِ عملی اپناوݨ تے زور ݙتا ڳئے۔ ݙوہیں ملکاں غیر قانونی سرگرمیاں دے سدِ باب کیتے وقتی مفاہمتی یادداشت (ایم او یو) تے دستخط کرݨ تے اتفاق کیتا۔ ایں موقع تے سکیورٹی و امیگریشن نال تعلق رکھݨ آلے قائم مشترکہ ورکنگ گروپ دی 90 ݙینھاں دی کارکردگی تے آندے لائحہ عمل دا وی جائزہ ڳھدا ڳیا۔ وفاقی وزیرِ داخلہ محسن نقوی ڳالھ کریندے آکھیا جو نقلی سٹوڈنٹ ویزیں دے ذریعے ٻاہرلے ملک ونڄݨ دے رجحان دے خاتمے کیتے سخت جانچ پڑتال ناگزیر اے۔ انہاں ݙسایا جو اینٹی نارکوٹکس فورس (اے این ایف) بروقت کارروائی کریندے برطانیہ سمگل کیتی ونڄݨ آلی 55 میٹرک ٹن منشیات ضبط کیتی جیڑھی انسدادِ منشیات کیتے پاکستان دی سنجیدگی دا ثبوت اے۔ ملاقات دے دوران مشرقِ وسطیٰ دی مجموعی صورتحال تے افغانستان نال سرحدی معاملیں تے وی ڳالھ کیتی ڳئی۔ ݙوہیں رہنماواں خطے اچ کشیدگی گھٹ کرݨ کیتے سفارتی کوششاں جاری رکھݨ تے اتفاق کیتا تے مشرقِ وسطیٰ اچ امن کیتے پاکستان دے مثبت کردار دی تعریف کیتی ۔ برطانوی وزیرِ مملکت سٹیفن ڈاؤٹی پاکستان اچ آن لائن فراڈ تے سائبر کرائمز اچ ملوث منظم عناصر دے خلاف قانون نافذ کرݨ آلے اداریں دی بھرپور کارروائیاں دی تعریف کیتی تے سانجھے تعاون کوں مزید وسعت ݙیوݨ دی خواہش دا اظہار کیتا۔ ملاقات اچ پاکستان اچ تعینات برطانوی ہائی کمشنر جین میریٹ، قونصلر سکیورٹی الاسڈئیر گرانٹ تے برطانوی وفد دے سیکرٹری میتھیو میک ماہون وی موجود ہن۔