کے پی حکومت دی دہشت گردی تے مجرمانہ غفلت ناقابلِ برداشت، صوبے کوں طالبان دے اتحادیاں دے رحم و کرم تے نی چھوڑ سڳدے، وزیرِ دفاع خواجہ محمد آصف

اسلام آباد۔7 اکتوبر (اے پی پی) وزیرِ دفاع خواجہ محمد آصف آکھیے جو خیبر پختونخوا حکومت دی دہشت گردی توں مکمل لاتعلقی تے مجرمانہ بے حسی حد توں ودھ چکی اے، ہݨ اہم فیصلے کرݨ دا ویلھا آ ڳئے تے خیبر پختونخوا دے عوام کوں طالبان دے اتحادیاں تے نااہل حکمراناں دے رحم و کرم تے مزید نی چھوڑیا ونڄ سڳدا۔ سوشل میڈیا پلیٹ فارم ’’ایکس‘‘ تے اپݨے بیان اچ وزیرِ دفاع آکھیا جو پی ٹی آئی دی صوبائی قیادت ہک ناکام سیاسی لانگ مارچ کیتے سڑکاں تے ماری ماری پھردی پئی اے جݙاں جو ایں دوران انہاں دے سہولت کاراں خیبر پختونخوا دے نہتے عوام دے خلاف دہشت گردی دی نویں لہر شروع کررکھی اے۔ انہاں آکھیا جو 6 اکتوبر کوں ڈیرہ اسماعیل خان اچ دہشت گرداں کسٹمز دے 2 اہلکاراں سودھے 5 بے گناہ لوکاں کوں بے دردی نال قتل کر ݙتا، مگر وزیراعلیٰ تے انہاں دی کابینہ روایتی بے حسی ݙکھیندے نہ تاں ایں بربریت دی مذمت کیتی، نہ جنازیں اچ شرکت کیتی تے نہ ہی لواحقین نال تعزیت دی زحمت گوارا کیتی۔ خواجہ آصف آکھیا جو ایں سنگین واقعے تے افسوس دے برعکس، وزیراعلیٰ اپݨی پارٹی دی ایماء تے رات کوں اجلاس سݙوا تے آئی جی پولیس تے چیف سیکرٹری خیبر پختونخوا دی سرزنش کیتی جو انہاں گورنر دی زیرِ صدارت سکیورٹی اجلاس اچ شرکت کیوں کیتی ہئی۔ انہاں آکھیا جو دہشت گردی دی بھاہ اچ سڑدے صوبے دے عوام کوں بے یار و مددگار چھوڑ ݙتا ڳئے جئیں پاروں عوام ہݨ خود صوبائی حکومت دے خلاف سڑکاں تے نکل تے احتجاج کریندے پئن۔ وزیرِ دفاع دا آکھݨ ہا جو کے پی دے عوام دا ٻہوں خون وہہ چکیے تے ہݨ اے برداشت نہ کیتا ویسے۔ پی ٹی آئی حکومت تے دہشت گرداں وچال ڳٹھ جوڑ تے سہولت کاری دے وافر ثبوت موجود ہن جیڑھے قوم گزریل ترائے سالاں توں ݙیکھدی پئی اے۔ انہاں واضح کیتا جو ماضی اچ جݙݨ نواز شریف، انہاں دی فیملی تے ن لیگ دی قیادت کوں کوڑے مقدمات اچ جیلاں اچ سٹیا ڳیا تݙاں وی مسلم لیگ (ن) اداریں کوں یرغمال نی بݨایا بلکہ آئینی و قانونی رستہ اختیار کیتا تے کݙائیں طالبان نال ہتھ نی ملایا۔ خواجہ آصف ݙو ٹوک الفاظ اچ خبردار کیتا جو پاکستان دی سالمیت تے وحدت کوں داؤ تے لا تے پورے صوبے کوں یرغمال بݨاوݨ دی اجازت ہرگز نہ ݙتی ویسے، ہݨ بس، ٻہوں تھی چکیے۔