پاکستان تے بحرین وچال قریبی ݙوپاسہ تعلقات کوں ݙوہیں ملکاں دی عوام کیتے ٹھوس نتائج اچ تبدیل کیتا ونڄے: اسحاق ڈار

اسلام آباد۔9 اکتوبر (اے پی پی) نائب وزیراعظم تے وزیرِ خارجہ سینیٹر محمد اسحاق ڈار بحرین دے نال پاکستان دے دیرینہ تے برادرانہ تعلقات دی اہمیت کوں اجاگر کریندیں ہوئیں ایں ڳالھ تے زور ݙتے جو قریبی ݙوپاسہ تعلقات کوں ݙوہیں ملکاں دے عوام کیتے ٹھوس نتائج اچ تبدیل کیتا ونڄے جݙانجو بحرین دے وزیرِ خارجہ ڈاکٹر عبداللطیف بن راشد الزیانی ݙوپاسہ تعلقات کوں ٻیا مضبوط بݨاوݨ تے مختلف شعبیاں اچ تعاون وسعت ݙیوݨ کیتے بحرین دے عزم دا اعادہ کیتے۔ ترجمان دفترِ خارجہ دے جاری بیان موجب نائب وزیراعظم تے وزیرِ خارجہ سینیٹر محمد اسحاق ڈار دی دعوت تے بحرین دے وزیرِ خارجہ ڈاکٹر عبداللطیف بن راشد الزیانی 7 تے 8 اکتوبر 2026ء کوں پاکستان دا سرکاری دورہ کیتا۔ دورے دے دوران انہاں نائب وزیراعظم تے وزیرِ خارجہ نال ݙوپاسہ مذاکرات کیتے جݙانجو صدرِ مملکت تے وزیراعظم نال وی ملاقاتاں کیتیاں۔ انہاں چیف آف آرمی سٹاف تے چیف آف ڈیفنس فورسز نال وی ملاقات کیتی۔ نائب وزیراعظم تے وزیرِ خارجہ سینیٹر محمد اسحاق ڈار تے بحرین دے وزیرِ خارجہ ڈاکٹر عبداللطیف بن راشد الزیانی وزارتِ خارجہ اچ پاکستان-بحرین مشترکہ وزارتی کمیشن (جے ایم سی) دے تریجھے اجلاس دی مشترکہ صدارت کیتی۔ ݙوہیں فریقاں تجارت تے سرمایہ کاری، زراعت و غذائی تحفظ، توانائی، بحری امور، انفارمیشن ٹیکنالوجی و ٹیلی کمیونیکیشن، صحت و تعلیم، محنت تے افرادی قوت تے عوامی رابطیاں سمیت مختلف شعبیاں اچ ݙوپاسہ تعاون تے تفصیلی ڳالھ مہاڑ کیتی۔ انہاں رابطیاں کوں مضبوط بݨاوݨ تے ݙوہیں ملکاں دے عوام وچال رابطے تے میل جول کوں فروغ ݙیوݨ دے اقدامات تے وی ڳالھ مہاڑکیتی۔ نائب وزیراعظم تے وزیرِ خارجہ بحرین دے نال پاکستان دے دیرینہ تے برادرانہ تعلقات دی اہمیت کوں اجاگر کریندیں ہوئیں ایں ڳالھ تے زور ݙتا جو قریبی ݙوپاسہ تعلقات کوں ݙوہیں ملکاں دی عوام کیتے ٹھوس نتائج اچ تبدیل کیتا ونڄے۔ انہاں مشترکہ ورکنگ گروپس سمیت ادارہ جاتی طریقۂ کار دے ذریعے طے شدہ فیصلیاں تے مؤثر عملدرآمد تے انہاں تے باقاعدگی نال پیشرفت دا جائزہ گھنݨ دی اہمیت تے وی زور ݙتا۔ بحرین دے وزیرِ خارجہ ڈاکٹر عبداللطیف بن راشد الزیانی ݙوپاسہ تعلقات کوں ٻیا مضبوط بݨاوݨ تے مختلف شعبیاں اچ تعاون وسعت ݙیوݨ کیتے بحرین دے عزم دا اعادہ کیتا۔ انہاں بحرین دی ترقی تے خوشحالی اچ پاکستانی برادری دے قابلِ قدر کردار دا وی اعتراف کیتا۔ مشترکہ وزارتی کمیشن دے تریجھے اجلاس دے اختتام تے ݙوہیں ملکاں دے وزرائے خارجہ اجلاس دے پروٹوکول تے دستخط کیتے۔ ݙوہیں فریقاں مشترکہ وزارتی کمیشن دا چوتھا اجلاس آئندہ سال منامہ اچ کرݨ تے وی اتفاق کیتا۔ ݙوہیں پاسوں علاقائی تے عالمی صورتحال تے وی تبادلۂ خیال کیتا ڳیا اتے اقوامِ متحدہ سمیت کثیر الفریقی فورماں تے تعاون تے ڳالھ مہاڑ تھئی۔ بحرین دے وزیرِ خارجہ آبنائے ہرمز دی صورتحال دے حوالے نال آپݨے ملک دے موقف دی وضاحت کیتی تے خطے اچ اڄوکے بحراناں دے دوران، بالخصوص اقوامِ متحدہ دی سلامتی کونسل اچ، پاکستان دے سفارتی کردار کوں سراہیا۔ نائب وزیراعظم تے وزیرِ خارجہ فلسطین، بھارت دے غیر قانونی زیرِ تسلط جموں تے کشمیر، سندھ طاس معاہدے تے افغانستان توں جنم گھنݨ آلے دہشت گردی دے خطرات دے حوالے نال پاکستان دے اصولی موقف کوں اجاگر کیتا۔ اے دورہ پاکستان تے بحرین دے ݙوپاسہ تعلقات اچ پیشرفت دا جائزہ گھنݨ تے آپسی تعاون کوں ٻیا ودھاوݨ دا اہم موقع ثابت تھیا۔ ایں نال ݙوہیں ملکاں دے درمیان قریبی تے برادرانہ تعلقات کوں ٻیا ودھاوݨ دے سانجھے عزم دا وی اعادہ تھیا۔