وزیراعظم شہباز شریف دی سعودی عرب دے خلاف حوثی ملیشیا دے دہشت گرد حملیاں دی مذمت

اسلام آباد۔9 اکتوبر (اے پی پی) وزیراعظم محمد شہباز شریف سعودی عرب دے خلاف حوثی ملیشیا دے دہشت گرد حملیاں دی شدید مذمت کریندیں ہوئیں سعودی قیادت تے عوام دے نال غیر متزلزل یکجہتی دا اظہار کیتے۔ جمعے کوں سماجی رابطے دی ویب سائٹ ’’ایکس‘‘ تے ہک بیان اچ وزیراعظم آکھیا جو او مملکتِ سعودی عرب دے خلاف حوثی ملیشیا دے ولا ولا تھیوݨ آلے دہشت گرد حملیاں دی شدید مذمت کریندن جنہاں اچ ریاض دے کنگ خالد انٹرنیشنل ایئرپورٹ تے ابہا انٹرنیشنل ایئرپورٹ کوں نشانہ بݨاوݨ وی شامل اے، انہاں حملیاں دے نتیجے اچ جانی نقصان دے نال نال کئی لوک زخمی تھئے۔ وزیراعظم سعودی مسلح افواج تے اتحادی افواج دی مستعدی تے پیشہ ورانہ صلاحیتاں کوں سراہندے ہوئیں آکھیا جو انہاں متعدد بیلسٹک میزائلاں کوں راہ اچ تباہ کر ݙتا۔ انہاں معصوم جاناں دے تحفظ تے مملکت دی سلامتی کوں یقینی بݨاوݨ کیتے انہاں دی مسلسل کوششاں کوں وی خراجِ تحسین پیش کیتا۔ وزیراعظم آکھیا جو پاکستان، مملکتِ سعودی عرب دی قیادت تے عوام دے نال غیر متزلزل یکجہتی دے نال کھڑے، مکہ مشترکہ دفاعی معاہدے تے ایں دی سٹریٹجک سیاسی تے دفاعی کمیٹی دے اڄوکے فیصلیاں موجب سعودی عرب دی خودمختاری، علاقائی سالمیت تے سلامتی کیتے پاکستان دا عزم غیر متزلزل اے، اساں سعودی عرب دے آپݨے عوام دے دفاع تے آپݨے شہراں تے اہم تنصیبات دے تحفظ دے جائز حق دی وی مکمل حمایت کریندوں۔ وزیراعظم آکھیا جو حوثی ملیشیا کوں اے حملے فوری طور تے بند کرݨے چاہیدن، اساں انہاں خطرات دے مقابلے اچ سعودی عرب دے نال  کھڑے رہسوں۔