وفاقی وزیر برائے منصوبہ بندی دی صدارت اجلاس، اشیائے ضروریہ دیاں قیمتاں اچ استحکام، عوام کوں ریلیف ݙیوݨ کیتے سخت اقدامات دی ہدایت

اسلام آباد۔9 اکتوبر (اے پی پی) وفاقی وزیر برائے منصوبہ بندی، ترقی تے خصوصی اقدامات پروفیسر احسن اقبال آکھیا جو عوام کوں ریلیف فراہم کرݨ اتے اشیائے ضروریہ دیاں قیمتاں اچ استحکام برقرار رکھݨا حکومت دی اولین ترجیح اے، ایں مقصد کیتے مارکیٹ دی مسلسل نگرانی تے ناجائز منافع خوری دے خلاف موثر کارروائی یقینی بݨائی ویندی پئی اے۔ جمعے کوں قومی قیمتاں دی نگرانی دے حوالے نال وفاقی وزیر دی صدارت اجلاس اچ مہانگائی دی صورتحال تے بازاری اشیائے ضروریہ دیاں قیمتاں دا جائزہ گھدا ڳیا۔ ایں موقع تے وفاقی وزیر صوبائی تے ضلعی انتظامیہ کوں ہدایت کیتی جو ہول سیل تے ریٹیل قیمتاں دے فرق تے کڑی نظر رکھی ونڄے اتے کݨک دے اٹے، ضروری اشیائے خوردونوش تے مائع پٹرولیم گیس (ایل پی جی) دی ذخیرہ اندوزی، منافع خوری تے ناجائز قیمتاں اچ اضافے دے خلاف فوری تے سخت کارروائی کیتی ونڄے۔ پروفیسر احسن اقبال آکھیا جو عالمی منڈی اچ قیمتاں اچ ڳھٹکی دے ثمرات براہِ راست پاکستانی کاشتکاراں تے عوام تئیں پڄاوݨ کیتے اقدامات کیتے ویندے پئن۔ انہاں ڈی اے پی کھاد دیاں عالمی قیمتاں اچ ڳھٹکی دا حوالہ ݙیندے ہوئیں آکھیا جو بین الاقوامی مارکیٹ اچ ملݨ آلے ریلیف کوں مقامی سطح تے منتقل کرݨا ضروری اے تانجو کاشتکاراں کوں ایں دا حقیقی فائدہ پڄے۔ وفاقی وزیر واضح کیتا جو پٹرولیم مصنوعات دی قیمتاں اچ ردوبدل دے بعد ٹرانسپورٹ کرایاں اچ غیر منصفانہ اضافے کوں برداشت نہ کیتا ویسے۔ متعلقہ حکام کوں ہدایت کیتی ڳئی جو کرایاں دی نگرانی کرن اتے عوام تے ودھیکی مالی بوجھ پاوݨ آلیاں دے خلاف ضابطے دے مطابق کارروائی یقینی بݨاون۔ انہاں آکھیا جو عوامی مفاد دا تحفظ، ضروری اشیاء دی مناسب قیمتاں تے دستیابی تے ناجائز منافع خوری دی روک تھام حکومت دی ترجیحات اچ شامل ہن۔ ایں مقصد کیتے مارکیٹ تے موثر نگرانی تے قیمتاں کوں قابو اچ رکھݨ دے اقدامات جاری رکھے ویسن۔