شیر شاہ ٹرین حادثہ، پاکستان ریلویز دے وݙے سٹیشناں تے 24 گھنٹے فعال ہیلپ ڈیسک قائم، مسافراں کیتے متبادل ٹرین تے بساں روانہ

لاہور/ملتان۔13 اکتوبر (اے پی پی) پاکستان ریلویز شیر شاہ دے نیڑے تھیوݨ آوݨ آلے ٹرین حادثے دے بعد مسافراں دی فوری سہولت تے رہنمائی کیتے ہنگامی بنیاداں تے جامع ریلیف اقدامات دا آغاز کر ݙتے۔ ریلوے ہیڈکوارٹرز توں جاری کردہ اپ ڈیٹ موجب، عوام الناس تے مسافراں کوں بروقت معلومات دی فراہمی کیتے ملک بھر دے تمام وݙے ریلوے سٹیشناں تے چووی ڳھنٹے کم کرݨ آلے انفارمیشن تے ہیلپ ڈیسک فعال کر ݙتے ڳئن۔ انتظامیہ تمام ڈویژنل کمرشل آفیسرز کوں خصوصی ہدایات جاری کیتن جو او مسافراں کیتے ترجیحی بنیاداں تے متبادل سفری انتظامات یقینی بݨاون تے سفر منسوخ کرݨ آلے مسافراں کوں ٹکٹاں دی رقم دی فوری واپسی (ریفنڈ) اچ سہولت فراہم کرن۔ ریلیف آپریشن دے تحت 500 توں ودھ مسافراں کوں گھن تے رحمان بابا ایکسپریس (47 اپ) دی متبادل ٹرین شیر شاہ سٹیشن توں آپݨی منزل آلے پاسے روانہ کر ݙتی ڳئی اے۔ ایں توں علاوہ ضلعی انتظامیہ ملتان دے تعاون نال انہاں مسافراں کیتے مفت بس سروس دا انتظام کیتا ڳئے جیڑھے بذریعہ سڑک آپݨا سفر جاری رکھݨ چاہندن۔ ریلوے انتظامیہ موجب، مسافراں کوں ہر ممکن سہولت دی فراہمی تے بروقت معاونت کیتے کمرشل ڈیپارٹمنٹ دی تمام فیلڈ فارمیشنز کوں ہائی الرٹ تے رکھیا ڳئے۔