پشاور اچ نجی سکول دی چھت ݙہݨ نال 22 افراد جاں بحق، کئی ٻال زخمی، ریسکیو آپریشن جاری، ڈپٹی کمشنر پشاور انکوائری کمیٹی قائم کر ݙتی

پشاور۔15 اکتوبر (اے پی پی) پشاور دے علاقے دیر کالونی اچ نجی سکول دی چھت ݙہݨ نال 22 افراد جاں بحق تے کئی ٻال زخمی تھی ڳئے۔ ریسکیو اہلکاراں ملبے تلے دبے ٻالاں تے سکول دے عملے کوں کݙھݨ کیتے امدادی کارروائیاں شروع کر ݙتیاں۔ ترجمان لیڈی ریڈنگ ہسپتال محمد عاصم دے مطابق دیر کالونی اچ سکول دی چھت ݙہݨ دے واقعے دے بعد ہݨ تئیں 22 افراد دی لاشاں تے 20 زخمیاں کوں ہسپتال منتقل کیتا ڳئے۔ جاں بحق تھیوݨ آلیاں اچ ہک تریمت ٹیچر وی شامل اے۔ ہسپتال اچ ایمرجنسی نافذ کر ݙتی ڳئی اے، جتھاں زخمیاں کوں فوری طبی امداد فراہم کیتی ویندی پئی اے، جݙانجو بعض زخمیاں دی حالت تشویشناک ݙسائی ویندی اے۔ ریسکیو حکام دے مطابق سکول دی چھت ݙہݨ نال کئی ٻال ملبے تلے دب ڳئے ہن۔ امدادی ٹیماں بھاری ملبہ ہٹاوݨ تے ممکنہ طور تے ٻئے ٻالاں تے عملے دی تلاش اچ مصروف ہن۔ ݙوجھے پاسوں سی سی پی او پشاور میاں سعید دے مطابق واقعے اچ زخمی تھیوݨ آلیاں دی تعداد 40 توں ودھ کر ڳئی اے۔ ڈپٹی کمشنر پشاور واقعے دیاں وجوہات معلوم کرݨ کیتے انکوائری کمیٹی قائم کر ݙتی اے۔ کمیٹی سکول دی عمارت دی چھت ݙہݨ دے اسباب دا تعین کریسی۔ ایں توں علاوہ کمشنر پشاور ڈویژن کیپٹن (ر) خالد محمود واقعے دی اطلاع ملدے ای زخمیاں دی عیادت تے صورتحال دا جائزہ گھنݨ کیتے نصیراللہ بابر میموریل ہسپتال پڄ ڳئن۔ واقعے دے بعد امدادی کارروائیاں جاری ہن، جݙانجو ملبے تلے دبے افراد دی تلاش تے زخمیاں کوں طبی امداد دی فراہمی تے توجہ مرکوز کیتی ڳئی اے۔