پاکستان آپݨی علاقائی خودمختاری، سالمیت دا دفاع کرݨ اتے کہیں وی جارحیت دا مناسب ولدا ݙیوݨ کیتے تیار اے: ترجمان دفترِ خارجہ دی ہفتہ وار بریفنگ

اسلام آباد۔16 اکتوبر(اے پی پی)ترجمان دفترِ خارجہ بھارتی وزیرِ دفاع دے اشتعال انگیز بیان کوں سختی نال مسترد کریندے آکھیے جو پاکستان آپݨی علاقائی خودمختاری اتے سالمیت دا دفاع کرݨ اتے کہیں وی جارحیت دا مناسب ولدا ݙیوݨ کیتے تیار اے، پاکستان ریاض دے کنگ خالد انٹرنیشنل ایئرپورٹ تے حوثی حملے دی سخت مذمت کریندے اتے مکہ مشترکہ دفاعی معاہدے دے تحت سعودی عرب دی خودمختاری، علاقائی سالمیت اتے سلامتی کیتے آپݨی جڑت دوہریندے۔ وزارتِ خارجہ اچ ہفتہ وار میڈیا بریفنگ اچ ترجمان دفترِ خارجہ سفیر سجاد حیدر خان آکھیا جو پاکستان کوں سعودی عرب تے جاری حملیاں تے ݙاݙھا چنتا اے اتے حوثی ملیشیا دے تازہ ترین دہشت گرد حملے دی سخت مذمت کریندے۔ انہاں سوگوار خانداناں کوں پرچاوݨی ݙیندے ہمدردی کیتی جو شہری آبادی اتے اہم انفراسٹرکچر تے حملے ناقابلِ قبول ہین جیڑھے علاقائی امن و سلامتی کیتے سنگین خطرہ ہین۔ ترجمان آکھیا جو 11 اکتوبر کوں پاکستان سعودی عرب، مصر اتے ترکیہ نال آر فور گروپ دے فریم ورک دے تحت مشترکہ بیان اچ حوثی حملیاں دی مذمت کیتی اتے سعودی عرب نال یکجہتی ݙکھائی اتے حملیاں دے فوری اتے غیر مشروط خاتمے دا مطالبہ کیتا۔ انہاں آکھیا جو ریاض ایئرپورٹ تے حملے اچ ہک پاکستانی شہری جاں بحق اتے ٻئے زخمی تھئن، پچھلے ہفتے یمن اچ ہک پاکستانی ڈرائیور جاں بحق تھئے۔ انہاں آکھیا جو پاکستان مکہ مشترکہ دفاعی معاہدے دا رکن اے اتے مکمل طور تے ایں معاہدے اچ شامل اے، او معاہدے دے تحت اپݨیاں ذمہ داریاں پوریاں کریسی، سعودی عرب کوں اپݨے اتے اپݨی خودمختاری دا دفاع کرݨ دا حق اے۔ انہاں آکھیا جو یمن بارے پاکستان دا موقف مستقل اتے واضح اے، تنازعہ صرف ڳالھ مہاڑ نال وی حل تھی سڳدے۔ فلسطینی مسئلے تے ترجمان آکھیا جو پاکستان 18 ٻئے ملکاں دے وزرائے خارجہ نال مل تے مقبوضہ بیت المقدس اچ کولمبیا دے سفارتخانے دے افتتاح دی مذمت کیتی۔ انہاں آکھیا جو اے اقدام اقوامِ متحدہ دی سلامتی کونسل دیاں متعلقہ قرارداداں دے خلاف اے اتے ݙو ریاستی حل کیتے نقصان دہ اے۔ انہاں نائب وزیر اعظم دے دورہ عمان، مالدیب نال ڳالھ مہاڑ، مصری اتے ترک وزیر خارجہ نال ملاقات اتے روس نال تعلقات تے وی موقف ݙسایا۔ ترجمان آکھیا جو پاکستان بھارتی وزیرِ دفاع دے اشتعال انگیز بیان کوں سختی نال مسترد کریندے، پچھلے سال بھارتی فوجی اشتعال انگیزی دا مؤثر جواب ݙتا ڳیا ہا اتے ہݨ وی پاکستان کہیں جارحیت دی صورت اچ اپݨی سلامتی دا مکمل دفاع کریسی۔ انہاں پاکستان دے انسدادِ دہشت گردی اقدامات دا خاکہ پیش کیتا جنہاں اچ نیشنل ایکشن پلان، آپریشن عزمِ استقرار اتے بہتر انٹیلی جنس کوآرڈینیشن شامل ہن۔