حضرت شاہ رکنِ عالمؒ دے 713ویں عرس دے سلسلے اچ ٹریفک پلان جاری، زائرین کیتے پارکنگ دا انتظام

ملتان۔17 اکتوبر (اے پی پی) سٹی ٹریفک پولیس ملتان حضرت شاہ رکنِ عالم ملتانیؒ دے 713ویں سالانہ عرس مبارک دے موقع تے ٹریفک پلان جاری کر ݙتے۔ عرس دی تقریبات 17، 18 تے 19 اکتوبر 2026ء کوں تھیسن۔ ٹریفک پلان دے مطابق عرس دے موقع تے قلعہ کہنہ قاسم باغ تے شہر دے اہم مقامات تے ٹریفک دی روانی برقرار رکھݨ کیتے ٹریفک پولیس اہلکار ترائے شفٹاں اچ خصوصی ڈیوٹیاں سرانجام ݙیسن، جݙانجو قلعہ کہنہ قاسم باغ دے تمام داخلی رستے ہر قسم دی ٹریفک کیتے بند رہسن۔ دور دراز علاقیاں توں آوݨ آلے زائرین دی بساں کیتے معصوم شاہ روڈ تے ولایت حسین کالج نال ملحقہ مقامات تے پارکنگ دا انتظام کیتا ڳئے، جݙانجو کاراں دی پارکنگ کیتے حسین آگاہی موڑ تے لائبریری موڑ مختص کیتے ڳئن۔ سٹی ٹریفک پولیس شہریاں تے زائرین توں اپیل کیتی اے جو ٹریفک اہلکاراں نال تعاون کرن، آپݨی گاݙیاں تے موٹر سائیکلاں مقررہ پارکنگ مقامات تے کھڑیاں کرن اتے ٹریفک قوانین تے عملدرآمد یقینی بݨاون تانجو عرس دے دوران ٹریفک دی روانی برقرار رکھݨ تے زائرین کوں آمد و رفت اچ سہولت ݙیوݨ اچ مدد مل سڳے۔