بلوچستان دے اضلاع کوئٹہ، نوشکی، خضدار اچ انٹیلی جنس دی بنیاد تے ترائے آپریشنز اچ 8 دہشت گرد جہنم واصل، آئی ایس پی آر

راولپنڈی۔18 اکتوبر (اے پی پی) سکیورٹی فورسز بلوچستان دے اضلاع کوئٹہ، نوشکی تے خضدار اچ 17 اکتوبر 2026ء کوں انٹیلی جنس دی بنیاد تے ترائے آپریشنز اچ 8 دہشت گرد جہنم واصل کر ݙتے۔ پاک فوج دے شعبۂ تعلقاتِ عامہ (آئی ایس پی آر) توں اتوار کوں جاری پریس ریلیز دے مطابق اے کارروائیاں فتنہ الہند (جیڑھا جو بھارت دا ہک آلہ کار گرو اے) نال تعلق رکھݨ آلے دہشت گرداں دی موجودگی دی اطلاع تے کیتی ڳئیاں، جیندے نتیجے اچ بھارت دے حمایت یافتہ 8 دہشت گرد ہلاک کر ݙتے ڳئے۔ 17 اکتوبر 2026ء کوں ضلع کوئٹہ دے علاقے پنجپائی اچ دہشت گرداں مقامی ٹریفک کوں روکݨ کیتے سڑک تے رکاوٹاں کھڑیاں کرݨ دی کوشش کیتی، جئیں کوں سکیورٹی فورسز ناکام بݨا ݙتا اتے بھارت دے حمایت یافتہ 5 دہشت گرد ہلاک کر ݙتے۔ ایں توں علاوہ ضلع نوشکی اچ علاقے کوں کلیئر کرواوݨ دی کارروائی دے دوران سکیورٹی فورسز دہشت گرداں دے ہک ٹھکاݨے دا سراغ لاتا۔ شدید فائرنگ دے تبادلے دے بعد بھارت دے حمایت یافتہ 2 دہشت گرد جہنم واصل کر ݙتے ڳئے اتے ایں دوران دہشت گرداں توں اسلحہ تے گولہ بارود وی برآمد کیتا ڳیا۔ اینویں ضلع خضدار اچ انٹیلی جنس دی بنیاد تے کیتی ڳئی ہک ٻئی کارروائی اچ سکیورٹی فورسز فوری تے جارحانہ اقدام کریندیں ہوئیں دہشت گرداں دے ٹھکاݨے کوں نشانہ بݨایا، جیندے نتیجے اچ بھارت دا حمایت یافتہ ہک دہشت گرد ہلاک تھیا۔ ایں کارروائی دے دوران وݙی مقدار اچ (490 کلوگرام) دھماکہ خیز مواد وی برآمد کیتا ڳیا۔ آئی ایس پی آر دے مطابق علاقے اچ موجود کہیں وی ٻئے بھارت نواز دہشت گرد دے خاتمے کیتے ’سینیٹائزیشن‘ (تلاشی تے صفائی) دی کارروائیاں جاری ہن۔ پاکستان دی سکیورٹی فورسز تے قانون نافذ کرݨ آلے اداریاں دی جانب توں ’عزمِ استحکام‘ (جیندے کوں نیشنل ایکشن پلان تے وفاقی ایپکس کمیٹی منظور کیتے) دے وژن دے تحت دہشت گردی دے خلاف جاری مہم پوری شدت نال جاری رہسی، تانجو ملک توں غیر ملکی حمایت یافتہ دہشت گردی دی لعنت کوں منݙھوں ختم کیتا ون٘ڄ سڳے۔