مالدیپ دے صدر ڈاکٹر محمد معیزو وزیراعظم محمد شہباز شریف دی دعوت تے 20 توں 22 اکتوبر تئیں پاکستان دا سرکاری دورہ کریسن ترجمان دفترِ خارجہ

اسلام آباد۔18 اکتوبر (اے پی پی) مالدیپ دے صدر ڈاکٹر محمد معیزو 20 توں 22 اکتوبر تئیں پاکستان دا سرکاری دورہ کریسن، دورے دے دوران ݙوپاسہ تعلقات دے سارے پہلواں دا جائزہ گھنݨ دے علاوہ تجارت، سرماے کاری، صحت، تعلیم، سیاحت، زراعت، دفاع، بحری سلامتی تے موسمیاتی تبدیلی سمیت مختلف شعبیاں اچ تعاون دے فروغ تے ڳالھ مہاڑ کیتی ویسی۔ ترجمان دفترِ خارجہ توں جاری بیان دے مطابق مالدیپ دے صدر محمد معیزو وزیراعظم محمد شہباز شریف دی دعوت تے پاکستان دا دورہ کریندیں پئن جݙانجو انہاں دے ہمراہ خاتونِ اول ساجدہ محمد، کابینہ دے وزراء تے اعلیٰ حکام تے مشتمل وفد وی پاکستان آسی۔ مالدیپ دے صدر ڈاکٹر محمد معیزو دورے دے دوران صدرِ مملکت آصف علی زرداری نال ملاقات کریسن جیڑھے جو انہاں دے اعزاز اچ سرکاری ضیافت وی ݙیسن۔ مالدیپ دے صدر وزیراعظم محمد شہباز شریف نال علیحدہ تے وفود دی سطح تے مذاکرات وی کریسن۔ ݙوہیں رہنما تجارت، سرمایہ کاری، صحت، تعلیم، سیاحت، زراعت، دفاع، بحری سلامتی تے موسمیاتی تبدیلی سمیت مختلف شعبیاں اچ تعاون دے فروغ دا جائزہ گھنسی اتے آپسی دلچسپی دے علاقائی تے عالمی معاملیاں تے وی ڳالھ مہاڑ کریسن۔ دورے دے دوران پاکستان مالدیپ بزنس فورم دا انعقاد وی تھیسی جیندا مقصد ݙوہیں ملکاں دی تجارتی برادریاں دے درمیان رابطیاں کوں فروغ ݙیوݨ اتے تجارت تے سرمایہ کاری دے نویں موقعے تلاش کرݨ اے۔ ایں موقع تے ݙوپاسہ تعاون دے مختلف شعبیاں اچ کئی معاہدیاں تے مفاہمتی یادداشتاں تے دستخط وی متوقع ہن۔ مالدیپ دے کہیں صدر دا 11 سال بعد پاکستان دا اے پہلا سرکاری دورہ اے، جئیں کوں ݙوہیں ملکاں دے درمیان 1966ء اچ سفارتی تعلقات دے قیام دی 60ویں سالگرہ دے تناظر اچ خصوصی اہمیت حاصل اے۔