وزیراعظم عمران خان اتے افغان صدر اشرف غنی وچال ون آن ون ملاقات، وفود دی سطح تے مذاکرات, ڈوہائیں ملکاں اتے عوام دے مفاد تے خطہ اچ امن، استحکام تے خوشحالی دے فروغ سانگے سانجھے اعتماد اتے ہم آہنگی تے قائم پاک۔افغان یاری اتے تعاون دا نواں باب شروع کرنڑ تے اتفاق

اسلام آباد ۔ 27 جون (اے پی پی) وزیراعظم عمران خان نال خمیس کوں وزیراعظم ہاﺅس اچ افغان صدر اشرف غنی ون آن ون ملاقات کیتی۔ایں موقع تے ڈوہائیں رہنماواں ڈوہائیں ملکاں اتے عوام دے مفاد تے خطہ اچ امن، استحکام تے خوشحالی دے فروغ سانگے سانجھے اعتماد اتے ہم آہنگی تے قائم پاک۔افغان یاری اتے تعاون دا نواں باب شروع کرنڑ تے اتفاق کیتا۔ ڈوہائیں رہنماواں ڈوطرفہ تعلقات دے سارے امور تے تفصیلی گالھ مہاڑ کیتی۔ جاری اعلامیے مطابق وزیراعظم ایں عزم دا اظہار کیتا جو پاکستان ”پرامن ہمسائیگی“ دے اپنڑے وژن مطابق پاک۔افغان تعلقات اچ معیاری تبدیلی گھن آونڑ سانگے پرعزم ہے۔ ڈوہائیں رہنماواں پاک۔افغان رابطیاں پاروں وژن بنڑاونڑ دی اہمیت تے اتفاق کیتا۔ وزیراعظم عمران خان سانجھی ذمہ داری تحت افغان امن عمل کیتے پاکستان دی حمایت دا یقین ڈیوایا ۔ انہاں ایں گالھ تے زور ڈتا جو افغان قیادت اتے افغان عوام دی حمایت رکھنڑآلا افغان امن عمل ہی افغانستان اچ سالاں توں پرانڑے جھیڑے کوں مکاونڑ دا ہکو حل ہے۔ ایں سانگے پاکستان ہمیشہ نتیجہ خیز بین الافغان مکالمے دی حمایت کیتی ہے۔ وزیراعظم عمران خان آکھیا جو پاکستان افغانستان دی خود مختاری اتے علاقائی سالمیت دااحترام کریندے اتے ایں نازک موڑ تے افغان عوام دے مونڈھے نال مونڈھا لا تے کھڑن دایقین رکھیندے۔عمران خان آکھیا جو پاکستان ہک پرامن، مستحکم، جمہوری اتے خوشحال افغانستان نال پختہ وابستگی رکھیندے اتے افغانستان نال سیاسی، تجارتی، اقتصادی اتے عوامی سطح تے مضبوط تعلقات دی خواہش رکھیندے۔ ڈوہائیں رہنماواں اتفاق کیتا جو افغانستان اچ پائیدار امن نال ڈوہائیں ملکاں کوں شاندار اقتصادی فائدے ملسن۔ انہاں ڈوطرفہ تجارت کوں ودھاونڑ ، راہداری تجارت کوں صحیح خطوط تے سدھے رستے تے لاونڑ سانگے رل مل تے کم کرنڑ اتے رابطہ کاری سانگے کوششاں کوں ودھاونڑ دا عزم کیتا۔ ایں موقع تے ایں گالھ دا پتہ لگیا جو سنٹر ایشیا اتے ساﺅتھ ایشیاء(کاسا۔1000) بجلی ٹرانسمیشن لائن اتے ترکمانستان۔افغانستان۔پاکستان۔بھارت (تاپی) گیس پائپ لائن ورگے وڈے توانائی رابطہ کاری منصوبیں کوں وختی مکمل کر تے متعلقہ ملکاں کوں لمبے عصے سانگے اقتصادی فائدے ملسن۔ تجارت، بنیادی ڈھانچہ اتے توانائی رابطے کو بیا پکا کرنڑ سانگے بئے رستے لبھے گن۔ افغانستان۔پاکستان راہداری تجارت رابطہ اتھارٹی (اے پی ٹی ٹی سی اے) اتے سانجھااقتصادی کمیشن سمیت موجودہ نظاماں توں چنگے فائدے گھنڑ تے اتفاق کیتا گیا تاں جوراہداری اتے ڈوطرفہ تجارت دی راہ اچ آونڑ آلیاں رکاوٹاں دور تھیونڑ اتے سانجھے فائدے سانگے اقتصادی تے تجارتی رابطیاں دے نویں امکانات لبھے ونج سگن۔ایں موقع تے علاقائی امور تے وی گالھ مہاڑ کیتی گی۔ وزیراعظم جنوبی ایشیااچ امن، ترقی اتے خوشحالی سانگے اپنڑے وژن دا اظہار کیتا۔ ایں توں پہلے نور خان ایئر بیس آونڑ افغان صدر اشرف غنی کو ں21 توپاں دی سلامی پیش کیتی گی۔ وزیراعظم ہاﺅس اچ باضابطہ استقبالیہ تقریب تھی،جتھاں انہاں کوں گارڈ آف آنر ڈتا گیا۔ وزیراعظم عمران خان وزیراعظم ہاﺅس آونڑ تے انہاں دااستقبال کیتا۔ وزیراعظم افغان صدر اتے انہاں دے وفد دے اعزاز اچ ظہرانہ ڈتا ۔