وزیرا عظم عمران خان دا لاک ڈاﺅن اچ مزید ڈو ہفتے توسیع ، تعمیراتی صنعت سمیت مختلف کاروبار کھولنڑ، ذخیرہ اندوزی اتے سمگلنگ روکنڑ کیتے سخت سزاواں تے مبنی آرڈیننس گھن آونڑ دا اعلان ،تعمیرات دے شعبہ کیتے اج بدھ کوں ہک وڈا پیکیج ڈیسوں ،وزیر اعظم عمران خان دی قومی رابطہ کمیٹی دے اجلاس دے بعد میڈیا کوں بریفنگ

اسلام آباد ۔ 14 اپریل (اے پی پی) وزیراعظم عمران خان کورونا وائرس توں بچنڑ کیتے لاک ڈاﺅن اچ مزید ڈو ہفتے توسیع ، تعمیراتی صنعت سمیت مختلف کاروبار کھولنڑ، ذخیرہ اندوزی اتے سمگلنگ روکنڑ کیتے سخت سزاواں تے مبنی آرڈیننس گھن آونڑ دا اعلان کریندے ہوئیں آکھیے جو پاکستان اچ کورونا پاروں موت انداز توں گھٹ اے ، تعمیرات دے شعبے کیتے اج بدھ کوں ہک وڈا پیکیج ڈیسوں ، احتیاطی تدابیر اپنا تے بیاں صنعتاں وی ضرورت دے مطابق کھول ڈتیاں ویسن ، اٹھارویں ترمیم دے تحت صوبیں کوں اختیار اے جو کہیں صنعت کوں کھولنڑ دے حوالے نال اپنڑاں فیصلہ خود کرسگدن ،کنڑنک دی کٹائی کیتے وستیاں اچ نقل و حرکت کوں کائناں روکیا ویسی ۔رمضان شریف اچ عبادت دے حوالے نال علما ءکرام نال مشورہ کیتا ویسی اساں ملک دی تاریخ دا ساریں توں وڈا احساس پروگرام ڈتے ، ہنڑ تئیں 28لکھ خانداناں اچ 47ارب روپے ونڈیے گئن ۔ایں پروگرام اچ کہیں قسم دی کوئی مداخلت کائنی ، رمضان اچ مہنگائی اتے ذخیرہ اندوزی کرنڑ آلیں دے خلاف حکومت سخت کاروائی کریسی ۔باہرلے ملکاں اچ پھسیے پاکستانیاں کوں مرحلہ وار ملک اچ گھن آیا ویسی۔ اے گال انہاں منگل کوں قومی رابطہ کمیٹی دے اجلاس دے بعد میڈیا کوں بریفنگ ڈیندے ہوئیں آکھی اے ۔ایں موقع تے وفاقی وزیر منصوبہ بندی و ترقی اسد عمر، وفاقی وزیر حماد اظہر، وزیراعظم دے معاون خصوصی برائے صحت ڈاکٹر ظفر مرزا، وزیراعظم دے معاون خصوصی برائے قومی سلامتی امور ڈاکٹر معید یوسف اتے وزیراعظم دی معاون خصوصی اطلاعات و نشریات ڈاکٹر فردوس عاشق اعوان وی موجود ہن ۔ وزیراعظم آکھیا جو کورونا وائرس کھنڈنڑ دا بہوں ڈر ہئی لیکن اوکھے حالات اچ اساں جیرھا لاک ڈاﺅن کیتے ایندی وجہ توں اساکوں خوشی نال آکھنڑاں پوندے جو جتنا اساکوں اندازہ ہئی ایندا صرف 30فیصد کورونا وائرس کھنڈیے ۔ انہاں آکھیے اساں تخمینہ دنیا دی صورتحال دے مطابق لاتا ہئی ایندے مطابق اساں ملک اچ دنیا دی صورت حال دا جیرھا اندازہ لاتا گیا ہئی ایندے مطابق اساڈے ملک اچ موت 190تئیں تھیونڑیاں ہن لیکن اے سو توں گھٹ رہی جڈاں جو امریکہ اچ اے تعداد ڈو ہزار یومیہ اے ،اساکوں اللہ سئیں دا شکر کرنڑاں چاہیدے جو ، اوکھا ویلھا گزردا پئے لیکن اساکوں اے وی ذہن اچ رکھنڑاں چاہیدے جو کہیں وی ویلھے کورونا وائرس کھنڈ سگدے ایں کیتے احتیاط ضروری اے ۔برزگ شہریاں تے بیمار لوک ایندا شکار زیادہ تھیندن لیکن نینگراں کوں وی چاہیدے جو او اپنڑے والدین دی زندگی خطرے اچ نہ پاون ۔ انہاں آکھیے جو اساڈے ہسپتالاں اچ سہولتاں موجود ہن ، وینٹی لیٹرز وی ہن، طبی عملے کیتے باہرلے ملکوں حفاظتی سامان منگوایا گئے حالی تئیں اساں ٹھیک ویندے پیوں لیکن ولا وی کورونا اگر تکھے کھنڈ گیا تاں اساڈا صحت دا نظام ایندا مقابلہ نہ کرسگسی ۔وزیراعظم آکھیے جو اساں ڈو محاذ تے لڑدے پیوں ہک کورونا کوں روکنڑ تے ڈوجھا ملک اچ 26 کیس تھئے ہن اساں لاک ڈاﺅن کیتا ہئی اینکوں اگوں گھن تے ٹرنڑاں اے ، سکول، کالج، سینما گھر، کھیڈ دے میدان وی جتھاں لوک جمع تھی سگدے ہن اتھاں لاک ڈاﺅن برقرار رہسی ،اساکوں ایں حوالے نال نظم و ضبط دا مظاہرہ کرنڑاں پوسی ۔انہاں آکھیے جو شہراں تے تعمیرات تے بئے متعلقہ شعبے اج توں کھولیندے پیوں ، صوبائی وزراءاعلیٰ تے چیف سیکرٹریاں نال وی مشورہ تھئے ، 98 فیصد اتفاق رائے تھی گے ہنڑ کیرھی صنعت کھولنڑیں اے کیرھی کائناں، تاں جو اٹھارویں ترمیم دے تحت صوبیں کوں اختیار اے جو اپنڑے زمینی حقائق دے مطابق کہیں صنعت کوں کھولنڑ دے حوالے نال اپنڑاں فیصلہ خود کرسگدن ۔