پاکستان کوں کوئی وی کشمیر توں انجھ نئیں کرسگدا، اگست ڈا ڈینھ یوم سیاہ اے جیڑھامقبوضہ وادی اچ ظلم و بربریت دا نواں دور گھن تے ابھریے،پاکستان اتے پارلیمانی کشمیر کمیٹی مقبوضہ کشمیر اچ بھارتی مظالم بارے جگ کوں سجاکا کرنڑ کیتے اپنڑا کردارادا کریندی راہسی،کشمیر بارے پارلیمنٹ دی خصوصی کمیٹی دے چیئرمین شہر یار خان آفریدی دااے پی پی کوں انٹرویو

اسلام آباد ۔ 24 جولائی (اے پی پی)کشمیر بارے پارلیمنٹ دی خصوصی کمیٹی دے چیئرمین شہر یار خان ا ٓفریدی آکھیے جو پاکستان کوں کوئی وی کشمیر توں انجھ نئیں کرسگدا،پاکستان کشمیریاں دی جدوجہد آزادی اتے حق خودارادیت کیتے مکمل سفارتی، سیاسی اتے اخلاقی حمایت جاری رکھیسی، ہر سطح تے بھارتی وزیراعظم نریندر مودا دا فاشسٹ چہرہ بے نقاب کیتا ویسی۔اے پی پی کوں ہک انٹرویو اچ انہاں آکھیے جو پاکستان دی شہ رگ کشمیر اے،کشمیری اتے پاکستانی ہکا قوم ہین جیکوں کوئی نکھیڑ نئیں سگدا،اساں کہیں کوں وی کشمیر دی حیثیت نہ وٹاونڑ ڈیسوں،کیوں جو کشمیرہک متنازعہ علاقہ اے جیکوں اقوام متھدہ دی سلامتی کونسل وی منیے۔آفریدی آکھیے جو اے معاملہ اقوام متحدہ دی سلامتی کونسل دیاں قرارداداں اتے کشمیریاں دی مرضی دے مطابق حل تھیونڑا چاہیدے۔انہاں پنج اگست ڈوہزار انوی دے بھارتی حکومت دے اقدام کوں غیر قانونی قرار ڈیندے ہوئے بنیادی انسانی حقوق لتاڑن دے مترادف قرارڈتے اتے آکھیے جو مودی سرکار مقبوضہو ادی اچ سنگین انسانی حقوق دیاں خلاف ورزیاں کریندی پئی اے۔انہاں آکھیے جو پارلیمانی کشمیر کمیٹی مقبوضہ کشمیر اچ بھارتی مظالم بارے جگ کوں سجاکا کرنڑ کیتے اپنڑا کردارادا کریندی راہسی۔انہاںا ٓکھیے جو پنج اگست ڈا ڈینھ مقبوضہ وادی اچ ظلم و بربریت دا نواں دور گھن تے ابھریے،اے ناانصافی، سیاسی نا پختگی اتے عالمی قوانین دی بدترین مثال اے،آر ایس ایس دی پروردہ مودی حکومت شرمناک اقدام کیتے اتے آرٹیکل پینتری اے اتے ترائے سو سترمکاونڑہک غیر قانونی اقدام اے جیندی کوئی توجیہہ نئیں بنڑدی کیوں جو ایندے بعد مقبوضہ وادی ہک کھلی جیل بنڑ چکی اے جتھاں کوئی وی کشمیری محفوظ کائنی،ایںا ٓرٹیکل نال کشمیریاں دے بنیادی حق سلب کر گھدے گین،بھارت عالمی قوانین،اقوام متحدہ دی سلامتی کونسل دیاں قرارداداں دیاں دھجیاں اڈا ڈتن اتے جگ کوں کھلا سنیہا ڈتے جو کجھ کر سگدے او کر گھنو۔شہر یار افریدی آکھیے جو مسلہ کشمیر تے ساری سیاسی قیادت ہک مٹھ اے اتے ہر عالمی فورم تے ایکوں اگونہا کیتا ویندا پئے،وزیراعظم عمران خان اتے قوم دا عزم اے جو کشمیر دا مسلہ تیکھے حل تھیونڑا چاہیدے،پاکستان دیاں مخلاصانہ کوششاں پاروں اے معاملہ پورے جگ اچ چاتا ویندا پئے، بھارت دے غیر قانونی اقدامات جانڑن دے باوجود ہنڑ اقوام متحدہ اتے پورے جگ کوں دباو سٹنڑا ہوسی جو اوبھارت کوں مجبور کرے جو کشمیریاں کوں انہاں دا حق خود ارادیت ڈتا ونجے۔انہاں پنج اگست کوں کشمیر دی تریخ اچ یوم سیاہ قرارڈیندےآکھیے جو مقبوضہ وادی اچ فوجی محاصرے لوکاں دا جیونڑقابل رحم بنڑا ڈتے جیندے تے جگ کوں کردارادا کیتے بغیر کوئی راہ کائنی۔