اقوام متحدہ ۔ 22 جون(اے پی پی) پاکستان آکھیا اے جو طالبان رہنما ملا اختر کوں نشانہ بناونڑ سانگے پاکستان دی سرزمین تے امریکی ڈرون حملے نال افغان امن عمل کوں شدید دھچکا لگیاہے۔ اقوام متحدہ وچ پاکستان دی مستقل مندوب ڈاکٹر ملیحہ لودھی سلامتی کونسل وچ افغانستان دی صورتحال تے مباحثے دے دوران خیالیں د ااظہار کریندے ہوئیں آکھیا جو پاکستانی سر زمین تے امریکی ڈرون حملہ پاکستان دی خود مختاری ، علاقائی سلامتی ، اقوام متحدہ دے چارٹر اتے بین الاقوامی قنون دی کھلی خلاف ورزی ہے ۔ ایں ناقابل قبول اقدام افغان مسئلے دی پیچیدگی اتے شدت وچ ودھارا کر ڈتا ہے۔ ڈرون حملے ایں حوالے نال سنجیدہ سوالات چاتے ہن جو بین الاقوامی برادری افغانستان وچ امن دے قیام وچ دلچسپی رکھیندی ہے یا جنگ جاری رکھنڑی ہے۔ پاکستانی مندوب آکھیا جو گزریل 15سال دے دوران طاقت دے استعمال دے ذریعے افغانستان وچ امن قائم نی کیتا ونج جا سگدا ۔ ایں خاطر ہنڑ ایں حکمت عملی توں گریز کرنڑ چاہیدے۔ پاکستانی مندوب ایں موقع تے افغان مندوب محمود سیکال دے ایں الزام کوں وی سختی نال مسترد کیتا جیندے وچ انہاںآکھیا جو پاکستان انہاں دے ملک دے اندرونی معاملات وچ مداخلت کریندا پئے اتے پاکستان وچ افغان مخالف دہشت گرد گروپاں دے ٹھکانڑے موجود ہن۔ ڈاکٹر ملیحہ لودھی آکھیا جوافغان مندوب دابیان بلاجواز ، حقائق دے برعکس اتے پاکستان اتے ایندے سرکاری اداریاں تے بے بنیاد الزامات ہن۔ پوری دنیا دہشت گردی کوں مکاونڑ سانگے پاکستان دے کردار اتے ایندیاں قربانیاں دا اعتراف کریندی ہے ۔ پاکستانی مندوب ایںموقع تے ایں عزم دا وی اعادہ کیتا جوپاکستان افغان امن عمل سانگے تعاون جاری رکھیسی۔ عالمی برادری افغانستان وچ امن سانگے وڈے پیمانے تے وسائل فراہم کیتے ہن ۔ پاکستانی مندوب ڈسایا جو افغان حکومت اپنڑیاں ناکامیاں دا ملبہ ڈوجھیاں تے پاونڑ توںگریز کرے۔ افغانستان دے بعد پاکستان دہشت گردی نال بہوں زیادہ متاثر تھیا اتے ایں ویلھے دہشت گردی دے خلاف سبھ توں وڈا آپریشن پاکستان وچ جاری ہے۔ مؤثر بارڈر منیجمنٹ پاکستان داحق ہے اتے اپنڑی سرحد دے اندر تعمیرات وچ کوئی گالھ غیر قانونی کائنی ایں حوالے نال افغان مندوب دے الزامات غلط ہن ۔ پاکستان اپنڑی سرحد تے مؤثر اتے ضروری اقدامت کریسی۔ انہاں آکھیا جو امن عمل تے تحمل اتے مستقل مزاجی نال پیش رفت سانگے چار فریقی گروپ قابل عمل میکنزم ہے تاں جو ایندے وچ کامیابی ایں صورت وچ ممکن ہے جڈاں سارے افغان فریق خودایں گالھ تے اتفاق کریسن اتے ملک وچ امن صرف غیر مشروط مذاکرات نال ہی ممکن ہے۔ پاکستانی مندوب اقوام متحدہ دے سیکرٹری جنرل بان کی مون دی حالیہ رپورٹ داحوالہ ڈتا جیندے وچ آکھیا گئے جو افغانستان وچ سیاسی ، اقتصادی اتے سلامتی دے حوالے نال صورتحال وچ کوئی چنگائی نی آئی ۔ انہاں آکھیا جو افغان حکومت دی ذمے داری ہے جوا وہ اپنڑی عوام نال کیتے گئے وعدے پورے کرے ۔
