اقوام متحدہ ۔ 14 جولائی (اے پی پی) مقبوضہ کشمیر وچ وگڑدی ہوئی صورتحال دے پس منظر وچ پاکستان ایں مسئلے کوں ہک واری ولااقوام متحدہ دی جنرل اسمبلی وچ چیندے ہوئیں جنوبی ایشیاءوچ امن وسلامتی سانگے کشمیریاں کوں انہاں داحق خود ارادیت ڈیونڑ دا مطالبہ کیتا ہے جیندا وعدہ انہاں نال اقوام متحدہ کر رکھیا ہے۔ اقوام متحدہ وچ پاکستان دی مستقبل مندوب ملیحہ لودھی 193رکنی جنرل اسمبلی وچ انسانی حقوق تے بحث دے دوران خیالیں دا اظہار کریندے ہوئیں آکھیا جو مقبوضہ کشمیر دی عوام کوں حق خود ارادیت ڈیونڑ توںانکار دے نتیجے وچ عصمت دری ، تشدد، غیرقنونی حراست اتے ماورائے عدالت قتل جئی انسانی حقوق دی سنگین خلاف ورزیاں سامنڑے آندیاں پن، ایندی حالیہ بے رحمانہ مثال کشمیری رہنما برہان وانی دا قتل ہے جیکوں بھارتی فوج فائرنگ کرتے درجنان بئے کشمیریان دے کٹھے قتل کیتا۔ برہان وانی دے قتل دے خلاف مقبوضہ کشمیر وچ وڈے پیمانے تے احتجاج تھیا اتے بھارتی سیکیورٹی فورسز دی مظاہرین تے براہ راست فائرنگ دے نتیجے وچ ہنڑ تائیں 36 بندے مارے گئے، تشدد دی ایہ لہر گزریل کئی سالان وچ شدید ترین ہے جیندے تے قابو پاونڑ سانگے ہورسینکڑاں بھارتی فوجی مقبوضہ کشمیر بھیجے ویندے پن۔ بھارتی سیکیورٹی فورسز کشمیری عوام دے حق خود ارادیت دے مطالبے کوں دباونڑ سانگے طاقت دا وحشیانہ استعمال کریندیاں پئیاں ہن جڈانجو سلامتی کونسل دیاںکئی قرارداداں وچ کشمیریان کوں حق خود ارادیت ڈیونڑ دا وعدہ کیتا گیا ہے۔ سلامتی کونسل ولوں کشمیریاں کوں حق خود ارادیت ڈیوانڑ سانگے کشمیروچ اقوام متحدہ دی زیر نگرانی استصواب رائے دے انعقاد دے پہلے وعدے کوں68 سال تھی گن پرا یہ وعدہ حالی تائیں پورا نی کیتا گیا۔ ایں وعدے کوں پورا کرنڑ ای لمبے عرصے توں حل طلب مسئلہ کشمیرداواحد حل اتے جنوبی ایشیاءوچ امن واستحکام دا ہکو رستہ ہے۔ عالمی برادری ولوں حق خود ارادیت کوں تسلیم کرنڑ دے نتیجے وچ دنیا دے کئی تنازعات جیرھے ایجھے ویلھے جاری ہن حل تھی سگدے ہن ۔
