کوئٹہ ۔ 8 اگست (اے پی پی) وزیراعظم محمد نواز شریف ریاست دی ساری سکیورٹی اداریاں کوں ہدایت کیتی اے جو دہشت گرداں دے خاتمے سانگے ساری طاقت نال کاروائیاں کیتیاں ونجن ،دہشت گرد سوکھے ہدف کوں نشانہ بنڑیندے پئن جئیں دا جدید طریقہ کار نال موثر جواب ڈتا ونجنڑاں چاہیدا اے۔او سونوار کوں گورنر سیکرٹریٹ کوئٹہ اچ ہک ہنگامی اجلاس دی صدارت کریندے پئے ہن ۔اجلاس اچ وزیر اعظم کوں سول ہسپتال اچ دہشت گردی دے حملے نال پیدا تھیونڑ آلی صورتحال بارے ڈسایا گئیا۔اجلاس اچ چیف آف آرمی سٹاف جنرل راحیل شریف، گورنر بلوچستان محمد خان اچکزئی، وزیراعلیٰ بلوچستان ثناء اﷲ زہری، کمانڈر سدرن کمانڈ لیفٹیننٹ جنرل عامر ریاض، ڈائریکٹر جنرل آئی ایس پی آر لیفٹیننٹ جنرل عاصم سلیم باجوہ، وزیراعظم دے مشیر برائے قومی سلامتی ناصر خان جنجوعہ، وفاقی وزیر اطلاعات تے نشریات پرویز رشید، ڈی جی ملٹری آپریشنز اتے ڈی جی ملٹری انٹیلی جنس شریک تھیے۔چیف سیکرٹری بلوچستان سیف اللہ چٹھہ وزیر اعظم کوں بریفنگ ڈتی۔ایں موقع تے وزیر اعظم آکھیا جو گزریل ترائے سالیں توں بلوچستان اچ امن دی بحالی بارے چنگائی ڈٹھی گئی اتے اے افسوسناک سانحہ قوم دے عزم کوں مَٹھا نی کر سگدا۔انہاں آکھیا جو ایندے اچ کوئی شک کائنی جو دشمن چین پاکستان اقتصادی راہداری دے خلاف ہن ۔انہاں آکھیا جو چیف آف آرمی سٹاف دی قیادت اچ فوج سی پیک بارے درپیش سکیورٹی دے خطرے نال چنگے طریقے لڑدی پئی اے۔ایں توں پہلے انہاں کوئٹہ آونڑ تے سی ایم ایچ دا دورہ کیتا اتے دہشت گردی دے حملے دے زخمیاں دی عیادت کیتی۔انہاں زخمیاں دی جلدی صحت یابی سانگے دعا کیتی۔
