اسلام آباد ۔ 14 اگست (اے پی پی) صدر مملکت ممنون حسین آکھے جو پاکستان دا مستقبل مضبوط جمہوریت نال جڑیا ہویا ہے اتے ایں رستے تے ٹُر تے اساں ملک دی ترقی تے خوشحالی کوں یقینی بنڑا سگدے ہئیں ، دہشت گردی دے خلاف جنگ اچ ساری قوم مسلح افواج دے نال کھڑی ہے ، دیدہ اتے نادیدہ دشمن کوں بھجنڑ کائناں ڈیسوں ، موجودہ چیلنجز نال نبڑنڑ سانگے تحریک پاکستان دی طرح دے جذبے دی لوڑ ہے ۔ معاشی استحکام اتے بدامنی کوں مکاونڑ سانگے قومی ایجنڈے تے کم کرنڑاں ہوسی ، ملک دی ترقی اتے استحکام دا راز جمہوریت اچ لُکیا ہویا ہے ، پاکستان اقوام متحدہ دیاں قرارداداں دے مطابق کشمیریاں کوں استصواب رائے دا حق ملنڑ تئیںا نہاںد ی سیاسی، سفارتی اتے اخلاقی حمایت جاری رکھیسی ۔ او اتوار کوں اتھاں کنونشن سنٹراچ 70ویں جشن آزادی دے موقعے تے پرچم کشائی دی مرکزی تقریب نال خطاب کریندے پئے ہن ۔ ایں توں پہلے انہاں وزیراعظم محمد نواز شریف دے نال قومی پرچم لہرایا۔ ایں موقعے تے وزیراعظم محمد نواز شریف دے علاوہ چیف آف آرمی سٹاف جنرل راحیل شریف، سپیکر قومی اسمبلی سردار ایاز صادق، وفاقی وزیراں ، سروسز چیفس ، مختلف ملکاں دے سفیراں، خاتون اول بیگم محمودہ ممنون اتے معاشرے دے ہر طبقے نال تعلق رکھنڑآلے بندیاں دی وڈی تعداد وی موجود ہئی ۔ صدرر مملکت آپنڑیں خطاب اچ آکھیا جو موجودہ چیلنجاں نال نبڑنڑ کیتے تحریک پاکستان دی طرح دی جدوجہد دی لوڑ ہے ۔ انہاں آکھیا جو قائداعظم محمد عی جناح جمہوریت کوں ہک مسلمان دی زندگی دا لازمی حصہ تصور کریندے ہن اتے ایں کوں اگوں ودھنڑ دا پوڑی سمجھدے ہن ۔ صدر مملکت قوم تے زور ڈتا جو او فروعی اختلافات کوں ہک پاسے رکھ تے تحریک پاکستان دے مشن کوں ایں عزم نال اگوں ٹورنڑ سانگے ہک مٹھ تھی ونجن تانجو پاکستان کوں ہک مضبوط جمہوری شناخت رکھنڑآلا ملک بنڑایا ونج سگے ۔ انہاں قوم تے زور ڈتا جو او قنون دی حکمرانی کوں یقینی بنڑاون ۔ پرچم کشائی دی تقریب 9 وجے شروع تھئی ایندے توں پہلے سارے ملک اچ سائرن وجائے گئے جیندے بعد ٹریفک ہک منٹ کیتے رُک گئی ،اسلام آباد دے مختلف تعلیمی اداریاں دے طلباء و طالبات قومی ترانہ اتے ملی نغمے پیش کیتے ، وفاقی دارالحکومت اچ 31جڈانجو صوبائی دارالحکومتاں اچ 21توپاں دی سلامی ڈتی گئی ۔ صدر اتے وزیراعظم پاکستان دا قومی لباس پاتا ہویا ہئی ، صدر ممنون حسین آکھیا جو یوم آزادی دے موقعے تے قوم حالیہ سانحہ کوئٹہ اچ انسانی جاناں دے ضیاع تے ڈکھی ہے ۔ ساری قوم ایں سانحہ دے متاثرین نال یکجہتی کریندی ہے ۔ انہاں شہیداں خون ضائع کائناں ویسی ۔ انہاں دہشت گردی دے واقعات اچ سیکیورٹی فورسز اتے سول آبادی ولوں جاناں دی قربانی ڈیونڑآلیاں کوں وی خراج عقیدت پیش کیتا۔ انہاں لوکیں کوں آکھیا جو او دشمن دے خلاف اتحاد دا مظاہرہ کرن۔ صدر مملکت توقع ظاہرکیتی جو پاکستان دی نوجوان نسل قومی ترقی کیتے تعمیری کردار ادا کریسی ۔ قائد اعظم دی زندگی اتے تحریک پاکستان دے کجھ واقعات دا حوالہ ڈیندے ہوئیں انہاں آکھیا جو قائداعظم اساکوں ہک کامیاب ریاست کیتے رہنما اصول ڈتے ہن ، جنہاں اچ مساوات ، اخوت، انصاف ، قنون دی حکمرانی ، آزاد خارجہ پالیسی اتے ریاستاں وچال برابری دی بنیاد تے دوستانہ تعلقات شامل ہن ۔ صدرمملکت آکھیا جو اساکوں آپنڑیں جشن آزادی دے موقعے تے آپنڑیں کشمیری بھراواں کوں نہیں بھولنڑاں چاہیدا، جیہڑے جو آپنڑیں آزادی کیتے کوششاں کریندے پئے ہن ۔ انہاں پاکستان دے ایں عزم کوں دہرایا جو اقوام متحدہ دیاں قرارداداں دے مطابق کشمیریاں کوں استصواب رائے دا حق ملنڑ تئیں انہاں دی سیاسی، سفارتی اتے اخلاقی حمایت جاری رکھی ویسی ۔ ایں موقعے تے صدر اتے وزیراعظم ملی نغمے پڑھنڑآلے بالیں اتے گلوکاراں دے نال تصویراں وی بنڑوایاں ۔
