خلاف ورزیاں جاری رہیاں تاں ایندابھرپور جواب ڈتا ویسی،پاکستان انتہائی ضبط دا مظاہرہ کیتا ہے، امن سانگے اساڈی جستجو دا غلط مطلب گھن تے ایکوں کمزوری دی علامت نہ سمجھیا ونجے، وزیراعظم محمد نواز شریف دا بیان
اسلام آباد ۔ 27 اکتوبر (اے پی پی) وزیراعظم محمد نواز شریف بھارتی فوج ولوں ورکنگ باﺅنڈری اتے لائن آف کنٹرول تے حالیہ بلا اشتعال فائرنگ اتے سیز فائردیاں خلاف ورزیاں دی پرزور مذمت کریندے ہوئیں آکھیا ہے جو پاکستان دی امن دی خواہش کوں کمزوری نہ سمجھیا ونجے۔ خمیس کوں وزیراعظم دے میڈیا آفس ولوں جاری بیان دے مطابق وزیراعظم آکھیا جو ا وہ چپراڑ اتے ہرپال سیکٹراں وچ ورکنگ باﺅنڈری اتے بھمبر سیکٹر وچ لائن آف کنٹرول تے باھرتی فوج ولوں 25 اتے 26 اکتوبر کوں بلا اشتعال سیز فائر خلاف ورزیاں دی پرزور مذمت کریندے ہن جنہاں دے نتیجے وچ ڈو شہری شہید اتے 9 زخمی تھئے۔ انہاں وکھیا جو اگرا یہ خلاف ورزیاں جاری رہیاں تاں انہاں دا بھرپور جواب ڈتا ویسی ۔ وزیراعظم آکھیا جواساں انتہائی ضبط دا مظاہرہ کیتا ہے، امن سانگے اساڈی جستجو دا غلط مطلب گھن تے ایکوںاساڈی کمزوری دی علامت نہ سمجھیا ونجے ، اساں امن پسند قوم ہسے، اسان سارے تصفیہ طلب مسئلیاں اتے تنازعاں کوں گالھ مہاڑ دے ذریعے حل کرنڑ تے یقین رکھیندوں۔ انہاں آکھیا جو ہک ذمے دار اتے خود مختار ریاست دی حیثیت نال اساںجنوبی ایشیاءدی عوام دی اجتماعی بہبود اتے خوشحالی سانگے علاقائی امن اتے استحکام سانگے کوشاں ہسے۔ انہاں آکھیا جوا یہ امر افسوسناک ہے جو اساڈے اقدامات اتے کاوشاں دا بھارت ولوں اوں انداز وچ جواب نی ڈتا گیا۔ وزیراعظم نواز شریف آکھیا جو بھارت کوں حالیہ واقعے دی تحقیقات کرنڑ چاہیدن اتے پاکستان کوں نتائج بارے آگاہ کیتا ونجے۔ اینکوں اپنڑی فوج کوں حقیقی روح دے مطابق سیز فائر دا احترام کرنڑ دی ہدایت کرنڑ چاہیدی ہے اتے دیہات کوں دانستہ طور تے نشانہ بناونر توں اجتناب کریندے ہوئیں ورکنگ باﺅنڈری اتے ایل او سی تے امن برقرار رکھنڑ چاہیدے۔
