کشمیر دے مسئلے کوں چاونڑ سانگے سوشل میڈیا کوں استعمال کیتا ونجنڑاں چاہیدا ہے ،بھارت تے کشمیر متعلق پائیدار اتے قابل عمل پالیسی دی تیاری سانگے ٹاسک فورس بنڑائی ونجے ،سندھ طاس معاہدے تے واضح موقت اختیار کرنڑاں چاہیدا ہے ،دنیا کوں اے واضح سنھیا ڈتا ونجے جو پاکستان دہشت گردی تے انتہا پسندی دے خلاف ساریں توں وڈی جنگ لڑدا پئے ،موجودہ صورت حال دے پیش نظر وزیر خارجہ دا تقرر مناسب ہوسی
اسلام آباد ۔7اکتوبر(اے پی پی) پورے ایوان تے مشتمل سینٹ دی کمیٹی پاکستان اتے بھارت دی اجوکی صورت حال دے حوالے نال پالیسی گائیڈ لائنز دے 22 نکات دی منظوری ڈے ڈتی ہے۔ جمعے کوں ایوان بالا دے اجلاس اچ پورے ایوان تے مشتمل کمیٹی دی رپورٹ اچ پیش کیتی ونجنڑ آلی پالیسی کوں گائیڈ لائن اچ آکھیا گیا ہے جو حکومت پاکستان کوں سندھ طاس معاہدے تے واضح موقف اختیار کرنڑاں چاہیدا ہے ۔اگر بھارت ہک پاسے طور تے عالمی معاہدے دی ذمے واریاں توں انجھ تھیندا ہے تاں ایں سلسلے اچ بھارت دے کردار کوں سامنڑے لاتا ونجنڑاں چاہیدا ہے ۔پاکستان دی سرزمین غیر ریاستی عناصر کوں استعمال کرنڑ دی اجازت کائناں ڈتی ویسی ۔پوری دنیا اچ واضح تے کھلا سنھیا ڈتا ونجے جو پاکستان دہشت گردی تے انہتا پسندی دے خلاف ساریں توں وڈی جنگ لڑدا پیا ہے اتے ایندے اچ غیر ریاستی عناصر دی کوئی گنجائش موجود کائنی ۔ پالیسی گائیڈ لائنز اچ آکھیا گیا ہے جو کشمیر متعلق بین الاقوامی کانفرنس کرائی ونجے ۔پاکستان تے بھارت ڈوہیں ملکاں دی سیاسی قیادت ولوں کنٹرول لائن دے نال امن بر قرار رکھنڑ سانگے طے شدہ طریقہ کار دا احترام کرنڑ دی ضرورت ہے ۔بیک چینل مذاکرات دی افادیت تے ضرورت کوں سامنڑے رکھیندے ہوئیں انہاں کوں بحال کیتا ونجے اتے ڈو پاسے جموں تے کشمیر متعلق اعتماد سازی دے اقدامات بحال کرنڑ اتے انہاں کوں ودھاونڑ دی ضرورت ہے ۔حکومت کوں پارلیمنٹ دے سانجھے اجلاس اچ پالیسی گائیڈ لائنز گھننڑی چاہیدی ہے ۔پارلیمنٹ دے مشورے نال قومی سلامتی کمیٹی بنڑائی ونج سگدی ہے ۔پاکستان کوں خطے اچ امن تے استحکام سانگے کیتے گے اقدامات دی حمایت جار ی رکھنڑی چاہیدی ہے ،موجود ہ صورت حال اچ ہک پورے وزیر خارجہ دا تقرر مناسب ہوسی ۔
