اسلام آباد ۔ 9 فروری (اے پی پی) وفاقی وزیر خزانہ سینیٹر اسحاق ڈار پاکستان اچ نجی شعبہ دے پہلے ایل این جی سپلائی منصوبے دی تیاری بارے کثیر الملکی کنسورشیم دیاںکوششاں دی تعریف کریندے ہوئیں ایں منصوبے اچ صف اول دی ملٹی نیشنل کمپنیاں دی شمولیت حکومت پاکستان دی اقتصادی کارکردگی اتے سرمایہ کار دوست پالیسیاں اُتے عالمی سرمایہ کاراں دے اعتماد کوں ظاہر کریندے ۔ او خمیس کوں اتھاں پاکستان اچ نجی شعبے دے پہلے ایل این جی سپلائی منصوبے اچ شامل کثیر القومی کنسورشیم دے سینئر ایگزیکٹوز دے اجلاس دی صدارت کریندے پئے ہن ۔ وفاقی وزیر پانڑیں تے بجلی خواجہ محمد آصف، وفاقی وزیر پٹرولیم و قدرتی وسائل شاہد خاقان عباسی، چیئرمین سرمایہ کاری بورڈ ڈاکٹر مفتاح اسماعیل وی اجلاس اچ شرکت کیتی۔ ایں موقعے تے وزیر خزانہ پرائس واٹر ہائوس کوپرز (پی ڈبلیو سی) دی پاکستانی معیشت بارے شائع تھیونڑ آلی اجوکی رپورت توں اجلاس کوں ڈسایا جیندے اچ آکھیا گئے جو پاکستان 2030ء تئیں 20 ویں وڈی اتے 2050ء تئیں 16 ویں وڈی معیشت بنڑ ویسی ۔ انہاں آکھیا جو پاکستان میکرو اکنامک استحکام ترائے سالیں اچ حاصل کیتے۔ پاکستان غیر ملکی زرمبادلہ دے ذخائر تریخ دی بلند ترین سطح اُتے پج گئے ہن ۔ جیہڑے جو 5 مہینے دے درآمدی بل کیتے کافی ہن ۔ ایں طرح طرح جی ڈی پی دی شرح نمو 2016ء اچ 4.7 فیصد رہی جیہڑی جو اٹھ سالی دی بلند ترین سطح ہے۔ وزیر خزانہ آکھے جو حکومت 10 ہزار میگاواٹ بجلی مختصر مدت اچ سسٹم اچ شامل کرنڑ دے منصوبیاں اُتے کم کریندی پئی ہے ، جڈانجو بئے 15 ہزار میگاواٹ 2018ء دے بعد سسٹم اچ شامل ہوسن۔ ایں موقعے تے وزیر پٹرولیم و قدرتی وسائل شاہد خاقان عباسی آکھے جو ایل این جی سپلائی دا اے منصوبہ پوری طرح نجی ہے جیندے اچ کہیں طرح دی حکومتی فنانسنگ کائنی ۔ ایں طرح پاکستان اچ آپنڑیں نوعیت دا پہلا منصوبہ بنڑ گئے ۔ انہاں آکھیا جو وزارت پٹرولیم تے قدرتی وسائل ایں منصوبے کیتے ہر ممکن تعاون تے معاونت فراہم کریسی ۔ وفاقی وزیر برائے پانڑیں تے بجلی خواجہ آصف آکھے جو اے منصوبہ بجلی دے شعبے کیتے گیس سپلائی دی لوڑ پوری کرنڑ کیتے بہوں اہم ہے ۔ اجلاس اچ شریک کنسورشیم دی نمائندگی کرنڑ االے سینئر ایگزیکٹوز حکومت پاکستان ولوں معاشی استحکام دے سلسلے اچ حاصل کیتی گئی کامیابیاں اتے ملک کوں اعلیٰ نمو ولوں گامزن کرنڑ سانگے کیتے ونجنڑآلیاں کوششاں دی تعریف کیتی ۔ انہاں آکھیا جو ایں منصوبے دا حکومت اُتے کئی بار کائناں امسی ۔ انہاں حکومت دی سرمایہ کار دوست پالیسیاں دی وی تعریف کیتی ۔
