اسلام آباد ۔ 28 اپریل (اے پی پی)وزیراعظم محمد نواز شریف اجوکے لوڈشیڈنگ دے دورانیہ تے کاوڑ کریندیں ہوئیں آکھیا جو عوام کوں ریلیف ڈیونڑ حکومت دی ذمہ واری اے،متعلقہ وزارتاں اتے انہاں دے اداریاں پیشگی منصوبہ بندی کائنی کیتی جئیں سانگے ذمہ واری دا تعین تھیونڑاں چاہیدے۔اے گالھ انہاں جمعہ کوں وزیراعظم ہائوس اچ توانائی بارے کابینہ کمیٹی دے ایں مہینے مسلسل چوتھے اجلاس دی صدارت کریندیں ہوئیں آکھی۔سیکرٹری پانڑی تے بجلی اجلاس کوں غیر فعال آئی پی پیز اتے کیپٹو پاور پلانٹس دی دستیابی اتے استعمال بارے ڈسایا۔انہاں نیپرا ولوں اپ فرنٹ ٹیرف بارے معاملیاں اتے موسم گرما سانگے لوڈمنیجمنٹ پلان بارے وی ڈسایا۔انہاں اجلاس کوں ڈسایا جو بجلی دی 866میگاواٹ پیداوار اپریل دے مہینے اچ نظام اچ بحال کر ڈتی گئی اے اتے مئی2017ء دے ادھ اچ بئی400میگاواٹ بجلی نظام اچ رل ویسی۔وزیرپانڑی تے بجلی اجلاس کوں ڈسایا جو بجلی دے نظام اچ رکاوٹاں دور کرنڑ دا پروگرام دسمبر 2017ء تئیں پورا تھی ویسی۔وزیر خزانہ اجلاس کوں پاکستان اچ سولر پاور منصوبیاں دی فنڈنگ بارے عالمی بینک دے صدر نال آپنڑی ملاقاتاں بارے ڈسیا۔وزیراعظم سیکرٹری پانڑی تے بجلی کوں ہدایت کیتی جو بجلی دی فراہمی دی صورتحال ہر گھنٹے بعد نگرانی سانگے خصوصی ٹیم بنڑاون۔انہاں ہدایت کیتی جو اے ٹیم بجلی دی ترسیل اتے ونڈ دے نظام دی نگرانی بارے وی ہفتہ وار بنیاد تے رپورٹ ڈیوے۔
