اسلام آباد ۔ 06 مئی (اے پی پی) وزیراعظم محمد نوازشریف اسلام آباد دے نویں ہوائی اڈے تئیں میٹرو بس سروس منصوبے دا منڈھ بدھ ڈتے ۔ میٹرو بس منصوبیاں کوں 4حصیاں اچ ونڈیا گئے ، پشاور موڑ توں نیو اسلام آباد ایئر پورٹ تئیں کل 9 بس سٹیشنز تعمیر تھیسن ۔ وزیراعظم دے نال سابق گورنر خیبر پختونخوا اتے وزیر اعظم دے مشیر برائے ہوابازی سردار مہتاب احمد خان ‘ چیئرمین این ایچ اے اتے بئے حکام وی موجود ہن ۔ وزیراعظم محمد نواز شریف کوں میٹرو بس منصوبے بارے ڈسایا گیا۔ پشاور موڑ توں اسلام آباد دے نویں ہوائیں اڈے تئیں ایں منصوبے دی لمبائی 25.6 کلو میٹر ہوسی ، منصوبے اچ 12پل اتے 11 انڈر پاسز دی تعمیر شامل ہوسی ۔ نیشنل ہائی وے اتھارٹی پشاور موڑ توں نیو اسلام آباد ایئر پورٹ تئیں میٹرو بس منصوبے دی تعمیر کریندی پئی ہے ۔
