ننکانہ صاحب ۔ 10 مئی (اے پی پی) وزیراعظم محمد نواز شریف آکھے جو پاکستان آندے کجھ سالیں اچ خطے دی مضبوط طاقت اتے ایشیائی ٹائیگر دی حیثیت نال ابھرسی ، خنجراب توں گوادر تئیں عظیم شاہراتی نظام بنڑایا ویندا پئے ، جیہڑا جو سرحداں توں باہر وسطی ایشیاء کوں وی ملاڈیسی ۔ اساں سیاسی مخالفین کولوں نہ تاں پہلے گھبرائے اتے نہ ہی اگوں تے گھبریسوں ، تعمیر و ترقی دا آپنڑاں مشن جاری رکھیسوں ۔ بدھ کوںاتھاں ایم تھری موٹر وے دے لاہور ۔ عبدالحکیم سیکشن دے کم دی اگوہیں دا جائزہ گھنڑ دے موقعے تے تقریب نال الیندے ہوئیں وزیراعظم منصوبیاں دی ڈتے گئے ویلے توں چار مہینے پہلے پورے تھیونڑ تے این ایچ اے اتے چینی ادارے کوں خراج تحسین پیش کیتا۔ انہاں آکھیا جو میں این ایچ اے دے چیئرمین اتے انہاں دی ٹیم دا مشکور ہاں جیہڑی جو بہوں پرعزم ہن ۔ انہاں آکھیا جو بلوچستان سمیت پنجاب، گلگت بلتستان اتے کشمیر اچ وڈے منصوبیاں اُتے کم جاری ہے ۔ انہاں آکھیاجومیں ایں منصوبے دے معائنے سانگے اتھاں آیا ہویاہاں ، تانجو ایندے کم دی رفتار کوںڈیکھ سگاں ۔ انہاں آکھیا جو پاکستان دی تریخ اچ پہلی واری اتنی وڈی تعداد اچ سڑکاں، موٹر ویز، ہائی ویز اتے ایکسپریس ویز بنڑدیاں پن ۔وزیراعظم آکھیا جو سارے ملک اچ بجلی دے بے حساب کارخانے لگدے پئے ہن ۔ ماضی دے حکمران جانڑبجھ تے بجلی وی نال گھن تے گئے ، اساں ولا گھن آندے پئے ہئیں ۔ بجلی دی گھٹکی کوں مکایا ویندا پئے ۔ انہاں آکھیاجو ایم تھری موٹر وے اُتے 50 ہزار بندے کم کریندے پئے ہن ۔ پاکستان اچ جاری منصوبیاں اُتے لکھاں لوک کم کریندے پئے ہن ۔ ایںموقعے تے وزیراعظم نواز شریف کوں این ایچ اے دے کم اچ منصوبے اُتے کم دی اگوہیں بارے ڈسایا، اتے ڈسایا جو لاہور ۔ عبدالحکیم موٹر وے منصوبے اُتے 146 ارب روپے لاگت مسی ، جیہڑا جو آپ دی اصل مدت توں چار مہینے پہلے مارچ 2018ء اچ پورا تھی ویسی ۔ ایم تھری موٹر وے عبدالحکیم دے نال ایم فور نال جُڑ ویسی ، جیہڑی جو لہور توں ملتان تئیں متبادل رستہ ڈیسی ۔ ایم تھری موٹر وے اُتے 201 مویشیاں اتے 705 پانڑیںدیاں گذر گاہیں ہن ۔ منصوبے دا 44 فیصد کم پورا تھی گئے ۔ این ایچ اے دے ڈسایا جو گوجرہ ۔ شورکوٹ موٹر وے دا حصہ وی آندے سال اپریل تئیں پورا تھی ویسی ۔ تقریب اچ وزیر برائے امور کشمیر برجیس طاہر اتے چیئرمین این ایچ اے شاہد اشرف تارڑ وی موجود ہن ۔
