اسلام آباد۔ 4 جولائی (اے پی پی) وزیراعظم محمد نواز شریف آکھیا جو دنیا اچ پاکستان ترقی بارے آپنڑاں ہک مقام رکھدے،پاکستان کوں استحکام دے20,30سال مل ویندن تاں بہوں سارے ملکاں توں اگوں نکل ویسوں،ترقی تھیسی تاں ٹیم وی چنگا کھیڈسی،پاکستان دا ناں اُچا تھیسی۔پی سی بی پاکستان آ کراہیں کرکٹ کھیڈنڑ سانگے کہیں دی منت نہ کرے ،جیڑھا خوشی نال امسی اونکوں خوش آمدید آکھسوں،جیڑھے نی امدے انہاں کوں مجبور کائنا کریسوں،او ویلھا جلدی آونڑ آلا اے جڈاں ہر کوئی آپنڑی مرضی نال پاکستان امسی۔2013ءاچ اساڈی حکومت آونڑ دے بعد معیشت چنگی تھئی اے،بجلی دے بحران اچ گھٹکی تھئی اے،سیاحت دے شعبے کوں فروغ ملےے،دہشت گردی دم ترڑیندی پئی اے،اساں ہر میدان دے فاتح ہیسے ،اللہ دا کرم رہے تاں گزریا ہوئیا کل وی آپنڑاں ہئی ،امدا ویلھا وی آپنڑاں اے،قومی کرکٹ ٹیم دے کھڈاری اصل ہیروز ہن ،تساں اساڈا سر فخر نال اُچا کر ڈتے،پاکستان کوں عزت بخشی،کھیڈاں دے ودھارے سانگے وزراءاعلیٰ یونین کونسل دی سطح تے چنگے کھیڈ دے میدان تعمیر کراون،آونڑ آلا ویلھا کھیڈاں دا ہوسی،قومی ترقی دے نال نال کھیڈاں دا وقت ہوسی۔او منگل کوں وزیراعظم آفس اچ آئی سی سی چیمپینز ٹرافی دی فاتح قومی کرکٹ ٹیم دے اعزاز اچ ڈتے گئے استقبالیہ توں خطاب کریندے پئے ہن جئیں 18جون کوں انگلینڈ اچ انٹرنیشنل چیمپینز ٹرافی دے فائنل اچ روایتی حریف بھارت کوں 180 رنز دے واضح فرق نال ہرایا ہئی۔استقبالیہ تقریب اچ قومی کرکٹ ٹیم دے کھڈاریاں اتے منیجمنٹ توں انج وفاقی وزیر،اراکین پارلیمنٹ سمیت مختلف شعبیاں توں تعلق رکھنڑ آلی شخصیات شرکت کیتی۔وزیراعظم ایں موقع تے قومی کرکٹ ٹیم دے کھڈاریاں اتے منیجمنٹ اچ چیکس ونڈےے۔
