ترکی دے نال اپنڑے برادرانہ تعلقات کو ں بہوں قدر دی نگاہ نال ڈیکھدوں
سفیر ترک صدر ولوں تہنیتی خط وزیراعظم کو ں پجایا
اسلام آباد ۔ 21 اگست (اے پی پی) وزیراعظم شاہد خاقان عباسی آکھیا ہے جو پاکستان دی حکومت تے عوام ترکی دے نال اپنڑے برادرانہ تعلقات کوں بہوں قدر دی نگاہ نال ڈیکھدے ہن ،جیرھا جو سانجھی تاریخ ،ہکو جیہی اقدار تے سانجھے مفادات دے مبنی ہن ۔انہاں اے گالھ پاکستان اچ ترکی دے سفیر باربر گرگن نال سنوار کوں گالھ مہاڑ کریندے ہوئیں آکھی ۔ملاقات اچ پاک ترک تعلقات تے تبادلہ خیال تھیا ۔ترک سفیر شاہد خاقان عباسی کوں وزرارت عظمی دا منصب سانبھنڑ تے مبارخ ڈتی ۔ترک صدر ولوں تہنیتی خط وی وزیرا عظم کوں پجایا گیا ۔وزیراعظم ایندے تے اطمینان دا اظہار کیتا دوہیں ملکاں وچال تعلقات گزریل چار سال توں مزید گھاٹے تے ودھیے ہن ۔انہاں آکھیا جو پاکستان ترکی دے نال اپنڑے رابطے خاص طور تے ڈو پاسے اقتصادی تعاون کوں مزید تقویت ڈیونڑ چاہندے ۔ وزیراعظم ترکی دے عوام سانگے اپنڑیاں نیک خواہشاں دا اظہار کیتا ۔
