مسلم لیگ (ن)جتنے ترقیاتی کم کرائے ہن اوندی مثال نی ملدی ، جولائی 2018ءدے عام انتخابات اچ مسلم لیگ (ن) ہی جت ویسی ، سیاست عدالت دے فیصلے عدالتاں اچ نی پولنگ سٹیشناں تے تھیندن ،نواز شریف کوںنا اہل کرنڑ دا فیصلہ وی گند آلی ٹوکری اچ ویسی
سیالکوٹ ۔ 8 جنوری (اے پی پی) وزیراعظم شاہد خاقان عباسی آکھیا ہے مسلم لیگ (ن)جتنے ترقیاتی کم کرائے ہن اوندی مثال نی ملدی ، جولائی 2018ءدے عام انتخابات اچ مسلم لیگ (ن) ہی جت ویسی ، سیاست عدالت دے فیصلے عدالتاں اچ نی پولنگ سٹیشناں تے تھیندن ،نواز شریف کوںنا اہل کرنڑ دا فیصلہ وی گند آلی ٹوکری اچ ویسی۔او سیالکوٹ اچ وزیر خارجہ خواجہ آصف دی رہائش گاہ تے ورکر کنونشن نال خطاب کریندے پے ہن انہاں آکھیا جو چار پنج سال حکومت کرنڑ توں بعد تنقید کرنڑ آلے ودھ اتے نعرے لاونڑ آلے گھٹ لبھدن ،اج تہاڈا اے جوش ڈیکھ تے لگدے جو آندا الیکشن مسلم لیگ ن ہی جتسی ،انہاں آکھیا جو اساں ہمیشہ شرافت دی سیاست کیتی ہے ،اتے عوامی مسلے حل کیتن ،گالھیں مندے ساڈی سیاست کائنی ،انہاں آکھیا جو جڈاں ویلھا آسی تاں لوک مسلم لیگ ن اتے نواز شریف دے حق اچ ہی فیصلہ ڈیسن ،انہاں آکھیا جو سیاسی پارٹیاں چولے آلی کار بدلنڑ آلے لوک کامیاب نی تھیندے ،جڈاں نواز شریف دے خلاف فیصلہ آئے اتے نواں وزیر اعظم بنڑاونڑ دی واری آئی ہے تاں پارٹی اچ کہیں وزیراعظم بنڑنڑ کیتے کہیں لابنگ کیتی ہے نہ ہی کوئی امیدوار ہئی ۔جڈاں فیصلہ تھے تاں اونکوں ساریں قبول کیتے ۔نواز شریف اگے وی ساڈا لیڈر ہا اگوں تے وی اوہو ہوسی۔انہاں آکھیا جو مسلم لیگ (ن) دی حکومت آئی تاں ملک حالا ت بہوں خراب ہن توانائی بحران ،دہشت گردی اتے معاشی ابتری دا سامنڑاں ہئی بھل مسلم لیگ ن دی حکومت ہر چیلنج نال نبڑ تے ڈکھائے اج نتیجے تہاڈے سامنڑے ہن ۔جیکر سابقہ حکومتاں اپنڑے حصے دے کم کریندیاں تاں ایجھے حالات نہ ہوندے ۔انہاں آکھیا جو جولائی اچ فیصلہ عوام کرنڑے،سیاست دے فیصلے عدالتاں اچ نی تھیندے نواز شریف دے خلاف فیصلہ آئے تاں اینکوں عوام قبول کیتے نہ ہی تاریخ منیے ۔ 2018اچ عوام جیرھا فیصلہ کریسی اساکوں قبول ہوسی َ۔ایں موقع تے وزیر داخلہ پروفیسر احسن اقبال، وزیر خارجہ خواجہ محمد آصف، رکن قومی اسمبلی رانا محمد شمیم موجود ہن ۔
