اسلام آباد ۔ 2 مارچ (اے پی پی) حکومت ولوں قومی اسمبلی کوں ڈسایا گیا جو پٹرولیم مصنوعات دیاں قیمتاں دا تعین اوگر ا کریندی اے ‘ عالمی منڈی اچ پٹرولیم مصنوعات دیاں قیمتاں54ڈالر توں ودھ تے 64ڈالر فی بیرل تھی گن ،جیویں قیمتاں گھٹ تھیاں عوام کوں ریلیف ڈتا ویسی ۔ جمعے کوںقومی اسمبلی اچ سید نوید قمر دے پٹرولیم مصنوعات دیاں قیمتاں اچ ودھارے متعلق توجہ کراونڑ دے نوٹس دا جواب ڈیندے ہوئیں وزیر مملکت خزانہ رانا محمد افضل خان آکھیا جو حکومت ہر مہینے پٹرولیم مصنوعات دیاں قیمتاں تے نظر ثانی کریندی اے ۔قیمتاں دا تعین اوگرا کریندی اے ۔قیمتاں دا تعین عالمی منڈی اچ تیل دیاں قیمتاں کوں سامنڑے رکھ تے کیتا وینداے ،اساڈی حکومت پٹرول دی قیمت 113روپے لیٹر توں گھٹ کرتے 70روپے تئیںکیتی ۔افراط زر دی شرح دا ہدف بجٹ اچ صرف 6فیصد رکھیا گے جڈاں جو افراط زر دی موجودہ شرح 3.75فیصد اے ۔ پٹرولیم مصنوعات تے حکومت سبسڈی کائنی ڈے سگدی۔ اگراے کیتا گیا تاں صوبے متاثر تھیسن ۔ انہاں آکھیا جو مٹی دا تیل 80 فیصد صنعتاں اچ استعمال تھیندے ۔ انہاں آکھیا جو الیکشن دے وقت واقعی تیل دیاں قیمتاں اچ ودھارا نی تھیونڑاں چاہیدا اے گال اساں کیتے ٹھیک کائنی ۔مگر قومی مفاد کوں سامنڑے رکھیندے ہوئیں اے فیصلے کرنڑیں پوندن ۔
